Tomorri pret mijëra pelegrinë, policia shton masat në akset drejt Teqesë së Kulmakut deri më 25 gusht

Pelegrinazhi zgjat për një javë me radhë, ndaj organizimi është çdo vit një sfidë për institucionet, që kanë ndërmarrë një plan masash. Policia e Beratit ka bashkuar forcat me Komisariatet e Policisë Berat, Kuçovë dhe Skrapar, me qëllim garantimin e rendit, parandalimin e krimit dhe rritjen e sigurisë rrugore.

Për të lehtësuar qarkullimin e mjeteve e këmbësorëve, nga data 18-25 gusht, janë vendosur shërbime shtesë në të gjitha akset rrugore që të çojnë në Malin e Tomorrit, si dhe në ambientet e jashtme të Teqesë.

“Drejtimi për drejtuesit e mjeteve që shkojnë në drejtim të Malit të Tomorrit (drejt teqesë) do të jetë: Rrethrrotullimi i Kombinatit – Unaza e qytetit – Rrethrrotullimi i Uznovës – Kryqëzimi i Plirëzit – Teqeja e Kulmakut. Itineraret për drejtuesit e mjeteve që kthehen nga Mali i Tomorrit (nga teqeja) do të jenë: Teqeja e Kulmakut – Bargullaz – Pronovik – Poliçan – Uznovë – Rruga kryesore “Antipatrea” – Rrethrrotullimi i Kombinatit. Drejtuesit e mjeteve dhe pelegrinët që vijnë nga qyteti i Çorovodës këshillohen të përdorin aksin rrugor Çorovodë – Gjerbës – Teqeja e Kulmakut dhe anasjelltas”, tha specialisti i trafikut urban, Lorenci.

Po ashtu, ndalohet qëndrimi dhe pushimi i mjeteve në akset rrugore dhe drejtuesit e mjeteve duhet të ndjekin udhëzimet e punonjësve të Policisë.

Rreth 600 mijë pelegrinë nga Shqipëria, Diaspora dhe mbarë bota udhëtojnë çdo vit drejt Teqesë së Kulmakut për të kremtuar festën e Baba Tomorrit, nën ritmet fetare të bektashinjve, pavarësisht besimeve fetare që u përkasin.

Besimtarët ngrenë çadrat e tyre në këtë vend të shenjtë, duke kryer kurbanin e festës dhe duke ngjitur me këmbë edhe majën e Malit të Tomorrit, i cili ndodhet 2416 metra mbi nivelin e detit.

Gjatë javës së pelegrinazhit, në Teqenë e Kulmakut dhe pranë varrit të Abaz Aliut, çdo pelegrin falet për shëndet, mirësi e paqe në familjet e tyre.

Top Channel