272 ditë në det/ USS Abraham Lincoln kthehet në SHBA me 5,000 marinarë të rraskapitur, makthi në aeroplanmbajtësen amerikane

Megjithatë, për rreth 5,000 marinarët në bord, misioni nuk ka përfunduar ende, pasi i pret një udhëtim prej rreth 13 mijë miljesh, që pritet të zgjasë edhe katër deri në pesë javë.

Anija ishte nisur nga San Diego më 21 nëntor 2025 dhe gjatë 272 ditëve të dislokimit bëri vetëm dy ndalesa të shkurtra: një në Guam në dhjetor dhe një tjetër në Oman për furnizim me karburant.

Pjesa më e madhe e misionit të aeroplanmbajtëses ishte e lidhur me operacionet ushtarake të Shteteve të Bashkuara kundër Iranit, në një periudhë kur Uashingtoni kishte rritur ndjeshëm praninë e tij ushtarake në Lindjen e Mesme.

Dislokimi është konsideruar ndër më të vështirët për Marinën amerikane në vitet e fundit. Mijëra pjesëtarë të ekuipazhit kaluan muaj të tërë pa pushime të konsiderueshme në tokë, ndërsa në javët e fundit janë raportuar probleme serioze me kushtet e jetesës në bordin e anijes.

Ligjvënës demokratë kanë ngritur shqetësime lidhur me mungesën e furnizimeve bazë, cilësinë e ujit, dëmtimin e ambienteve sanitare dhe përkeqësimin e gjendjes mendore të disa pjesëtarëve të ekuipazhit.

Problemet e furnizimit dyshohet se u përkeqësuan pas shkatërrimit nga Irani të një baze detare amerikane në Manama të Bahreinit, e cila shërbente si një nga qendrat kryesore të mbështetjes për forcat amerikane në Gjirin Persik.

Kreu i Komandës Qendrore të SHBA-së, admirali Brad Cooper, është përpjekur të minimizojë disa prej ankesave, duke i cilësuar një pjesë të problemeve si “lajme të vjetra”. Në një shkrim për The Wall Street Journal, ai i uroi ekuipazhit të Lincoln kthim të sigurt pranë familjeve të tyre.

Megjithatë, largimi i USS Abraham Lincoln nuk nënkupton ulje të pranisë ushtarake amerikane në Lindjen e Mesme. Hapësira e lënë prej saj është mbushur nga USS George Washington, aeroplanmbajtësja amerikane me bazë në Japoni, e cila tashmë është vendosur nën kontrollin operacional të CENTCOM.

Shtetet e Bashkuara vazhdojnë të mbajnë rreth 20 anije luftarake në rajon, jashtë Gjirit Persik. Në mesin e tyre janë dy grupe luftarake aeroplanmbajtësesh, të përqendruara rreth USS George H.W. Bush dhe USS George Washington, si dhe një forcë amfibe me një Njësi Ekspedite Detare dhe disa shkatërrues.

Këto forca janë ngarkuar gjithashtu me zbatimin e bllokadës së rinovuar ndaj porteve iraniane, të urdhëruar nga Presidenti Donald Trump, e cila tashmë ka hyrë në ditën e 38-të.

Top Channel