Rusia shpall në kërkim djalin e Sekretarit amerikan të Shëndetësisë, akuzohet për pjesëmarrjen si mercenar në luftën e Ukrainës

Vendimin e bëri publik më 12 gusht agjencia shtetërore ruse TASS.Kennedy akuzohet për “mercenarizëm” sipas Kodit Penal të Federatës Ruse, vepër që parashikon dënim me shtatë deri në dhjetë vjet burg. Sipas TASS-it, avokati i tij e ankimoi vendimin, por gjykata e la në fuqi.

Conor Kennedy, stërnip i presidentit John F. Kennedy, u bashkua me Legjionin Ndërkombëtar të Ukrainës në vitin 2022, në nisjen e pushtimit rus në shkallë të plotë. Besohet se u largua në tetor të po atij viti, pas një periudhe të shkurtër shërbimi.

Në një postim në Instagram në tetor 2022, ai shkroi se ishte prekur thellësisht nga ngjarjet që kishte ndjekur gjatë vitit në Ukrainë. Sipas rrëfimit të tij, nuk kishte asnjë përvojë ushtarake para se të rekrutohej dhe ia kishte bërë të ditur vendimin vetëm një rrethi shumë të ngushtë: një personi në Shtetet e Bashkuara i tregoi se ku ndodhej, një personi në terren i tha emrin e vërtetë. Nuk donte, shkruante ai, që familja dhe miqtë të shqetësoheshin, as “të trajtohesha ndryshe atje”.

Legjioni Ndërkombëtar u ngrit në fillim të vitit 2022, me vullnetarë të huaj që shërbenin si ushtarë të mirëfilltë, në të njëjtat kushte me trupat ukrainase. Moska e ka kundërshtuar vazhdimisht këtë status juridik, duke i cilësuar ata mercenarë. Legjioni u shpërbë në shkurt 2026 dhe luftëtarët e huaj u transferuan në njësi të rregullta të Forcave të Armatosura të Ukrainës.

Babai i tij, Robert F. Kennedy Jr., u betua më 13 shkurt si sekretari i 26-të i Shëndetësisë në administratën e presidentit Donald Trump.

Top Channel