Real Madridi është vetëm një hap larg finalizimit të një prej transferimeve më të bujshme të kësaj vere.
“Los Blancos” kanë intensifikuar negociatat me RB Leipzig për talentin e Bregut të Fildishtë, Yan Diomandé, dhe sipas burimeve pranë bisedimeve, marrëveshja është shumë afër mbylljes.
Klubi madrilen ka parë të refuzohen dy ofertat e para, fillimisht 100 milionë euro dhe më pas 115 milionë euro, pasi drejtuesit e Leipzig kanë kërkuar një pagesë të garantuar prej të paktën 120 milionë eurosh. Megjithatë, palët kanë bërë hapa të rëndësishëm drejt kompromisit dhe marrëveshja pritet të arrijë një vlerë totale prej rreth 135 milionë eurosh, përfshirë bonuset e ndryshme. Shuma fikse besohet se do të jetë mes 115 dhe 120 milionë eurove.
Nëse aktivizohen të gjithë bonuset e parashikuara në kontratë, Diomandé do të bëhet blerja më e shtrenjtë në historinë e Real Madridit, duke lënë pas transferimet e Jude Bellingham dhe Eden Hazard.
Vetëm 19 vjeç, sulmuesi afrikan ka shpërthyer gjatë sezonit të fundit me fanellën e RB Leipzig, ku regjistroi 12 gola dhe 8 asistime në Bundesliga, ndërsa paraqitjet e tij me kombëtaren e Bregut të Fildishtë në Kupën e Botës kanë rritur edhe më shumë vlerën e tij në tregun ndërkombëtar.
Për Leipzig, kjo do të ishte një nga shitjet më fitimprurëse në historinë e klubit. Gjermanët e transferuan Diomandén vetëm një vit më parë nga Leganés për 20 milionë euro, ndërsa tani janë pranë një fitimi marramendës.
Vendimtar në operacion ka qenë edhe trajneri i ri i Real Madridit, José Mourinho, i cili ka zhvilluar biseda personale me futbollistin dhe ka marrë dritën jeshile për transferimin. Ndërkohë, Diomandé po stërvitet me ngarkesë të reduktuar te Leipzig, në mënyrë që të shmanget çdo dëmtim deri në përfundimin e marrëveshjes që mund të trondisë tregun europian të transferimeve.
Top Channel
