Spanja ka rikthyer dominimin në futbollin botëror dhe tashmë tifozët iberikë kanë një arsye të madhe për të ëndërruar. Me triumfin në Kupën e Botës 2026, “La Roja” ndodhet në të njëjtën rrugë që e bëri legjendare brezin e artë të Xavi-t, Iniesta-s dhe Casillas-it.
Skuadra e Luis de la Fuente kishte fituar fillimisht Euro 2024, ndërsa tani ka ngritur edhe Kupën e Botës 2026, duke krijuar mundësinë për të përsëritur ciklin historik Europian-Botëror-Europian.
Ky është pikërisht skenari që Spanja realizoi mes viteve 2008 dhe 2012, kur fitoi Euro 2008, Botërorin 2010 dhe më pas Euro 2012, duke u bërë kombëtarja e parë në histori që triumfoi në tre turne madhorë radhazi.
Tashmë objektivi i madh është Euro 2028. Nëse Spanja arrin të fitojë edhe Kampionatin Europian që do të zhvillohet në Britaninë e Madhe dhe Irlandë, do të përsërisë një nga arritjet më të mëdha në historinë e futbollit ndërkombëtar.
Brezi aktual, i udhëhequr nga emra si Lamine Yamal, Nico Williams, Pedri, Rodri, Dani Olmo dhe heroi i finales Ferran Torres, ka treguar se ka cilësinë dhe vazhdimësinë për të dominuar futbollin botëror edhe në vitet e ardhshme.
Triumfi ndaj Argjentinës në finalen e Botërorit 2026 nuk i solli vetëm trofeun e dytë botëror Spanjës, por hapi edhe një kapitull të ri, që të kujton periudhën më të lavdishme në historinë e “La Roja”.
Nëse historia do të përsëritet edhe në vitin 2028, Spanja jo vetëm që do të konfirmojë epokën e saj të re të artë, por do të barazojë një tjetër rekord që vetë e vendosi më shumë se një dekadë më parë.
Top Channel
