Spanja nuk dominoi vetëm në fushë, por edhe në ceremoninë e ndarjes së çmimeve individuale të Kupës së Botës 2026. Pas triumfit në finalen ndaj Argjentinës, kampionët e rinj të botës rrëmbyen tre nga vlerësimet më prestigjioze të turneut.
Çmimi më i rëndësishëm individual, “Topi i Artë” për lojtarin më të mirë të Botërorit, iu dha mesfushorit Rodri, i cili ishte një nga protagonistët kryesorë të suksesit të Spanjës me paraqitjet e tij gjatë gjithë turneut.
Edhe portieri Unai Simón u vlerësua me “Dorezën e Artë”, si portieri më i mirë i kompeticionit, pasi ishte vendimtar në rrugëtimin e Spanjës drejt trofeut dhe e mbylli turneun me paraqitje të shkëlqyera.
Ndërkohë, talenti Pau Cubarsí fitoi çmimin “Lojtari më i Mirë i Ri”, duke konfirmuar statusin e tij si një nga zbulimet më të mëdha të këtij Botërori.
I vetmi çmim që nuk shkoi për Spanjën ishte “Këpuca e Artë”, e cila iu dorëzua Kylian Mbappe si golashënuesi më i mirë i turneut me 10 gola të shënuar.
Në krahun tjetër, Lionel Messi e mbylli Botërorin pa asnjë çmim individual. Kapiteni i Argjentinës nuk arriti të përsëriste suksesin personal të katër viteve më parë dhe, pavarësisht mbërritjes në finale me kombëtaren e tij, nuk u përfshi mes fituesve të asnjë prej vlerësimeve kryesore.
Fituesit e çmimeve të Botërorit 2026:
Topi i Artë: Rodri (Spanjë)
Doreza e Artë: Unai Simón (Spanjë)
Lojtari më i Mirë i Ri: Pau Cubarsí (Spanjë)
Këpuca e Artë: Kylian Mbappe (Francë)
Dominimi i Spanjës në ceremoninë e ndarjes së çmimeve ishte pasqyrë e një turneu të jashtëzakonshëm, ku “La Roja” jo vetëm ngriti Kupën e Botës, por konfirmoi edhe epërsinë e saj me lojtarët më të spikatur të kompeticionit. Ndërsa Messi dhe Argjentina u larguan vetëm me medaljet e vendit të dytë, Spanja kurorëzoi një Botëror që do të mbahet mend si një nga më të suksesshmit në historinë e saj.
Top Channel
