Witkoff dhe Kushner drejt Zvicrës, SHBA dhe Irani gati për raundin e ri të negociatave bërthamore

Sipas raportimeve të Axios, duke cituar një burim nga qeveria amerikane, bisedimet synojnë të rinisin procesin diplomatik mes dy vendeve pas muajsh tensionesh dhe zhvillimesh të shumta në Lindjen e Mesme.

Qëllimi kryesor i negociatave është hartimi i një marrëveshjeje gjithëpërfshirëse që do të përfshijë si uljen e tensioneve në rajon, ashtu edhe zgjidhjen e mosmarrëveshjeve lidhur me programin bërthamor të Iranit.

Burimi i cituar nga Axios bën të ditur gjithashtu se Jared Kushner, dhëndri dhe bashkëpunëtori i afërt i Donald Trump, ndodhet tashmë në Zvicër, duke shtuar spekulimet për një aktivitet intensiv diplomatik në prapaskenë për përgatitjen e negociatave.

Deri më tani nuk ka pasur konfirmime zyrtare nga Uashingtoni apo Teherani lidhur me zhvillimin e bisedimeve, megjithatë lëvizjet diplomatike në Zvicër po ndiqen me interes të lartë nga komuniteti ndërkombëtar.

Negociatat konsiderohen një përpjekje e rëndësishme për të ulur tensionet në Lindjen e Mesme dhe për të gjetur një zgjidhje afatgjatë për çështjen e programit bërthamor iranian, një nga temat më të ndjeshme në marrëdhëniet mes SHBA-së dhe Iranit.

Top Channel