“Nuk pas bërë gjë unë, duke lypur më kapë kapur. Ku do ha, ku do pi? Pension kam pas marrë por nuk marr më”, u shpreh lypësi.
Në dyert e gjykatave ka shumë që kërkojnë pafajësi, por këmbëngulja e lypësit Ylli Berisha u gjet e bazuar në prova.
Siç raporton gazetarja e Top Channel Anila Hoxha, Gjykata Penale e Tiranës shpalli të pafajshëm 46-vjeçarin duke rrëzuar prokurorinë që kërkoi dënimin e tij për kundërshtim të forcave të policisë.
Akuza me të cilën u përball Berisha lypës prej 17 vitesh në Tiranë u zyrtarizua mbas një aksioni të policisë dy vite më parë. 46-vjeçari nuk pranoi largimin nga vendi ku po lypte pranë ‘Farmacisë 10’ dhe mbas kësaj ai u dërgua në polici.
Ndaj tij në proces dëshmuan oficerët që e ndaluan, ndërsa prokuroria kishte kërkuar të dënohej me 2 muaj burg. Mbas incidentit me policinë lypësi tha në gjykatë se nga frika e autoriteteve ishte zhvendosur për të lypur në Fushë-Krujë, ndërkohë që me marrjen e pafajësisë ai komentoi ‘jam një lypës i pafajshëm’.
Top Channel
