Adli ndryshon mendje, do të luaj për Algjerinë: “Të vesh këtë fanellë do të jetë gjëja më madhështore për mua” 02/05 02:18
Venezia është ngjitur tashmë në Serie A, ndërsa Palermo, Catanzaro, Modena dhe Juve Stabia e kanë siguruar pjesëmarrjen në fazën “play-off” për ngjitjen në elitë.
Për të gjitha ekipet e tjera, fati do të vendoset në ndeshjen e fundit, ku duhet të marrin rezultatin e duhur dhe të shpresojnë në kombinimet e favorshme.
Pritet të përcaktohet skuadra e dytë që ngjitet direkt, ekipi i tetë që plotëson zonën “play-off”, dy skuadrat që do të luajnë në “play-out” për të shmangur rënien dhe tre ekipet që do të zbresin direkt në Serie C. Me vetëm 90 minuta të mbetura, Serie B konfirmohet si një turne jashtëzakonisht i luftuar. Fakti që deri para dy javësh asgjë nuk ishte e sigurt (diçka që nuk kishte ndodhur prej 49 vitesh), tregon rivalitetin e lartë. Deri tani, i vetmi verdikt i prerë është ngjitja e Venezias. Ndërkohë, Palermo (e katërta), Catanzaro (e pesta), Modena (e gjashta) dhe Juve Stabia (e shtata) presin të qeta fillimin e fazës pasardhëse. Pesëmbëdhjetë skuadrat e tjera do të luftojnë për objektivat e tyre respektivë me motivim maksimal.
Garë “kokë më kokë” për vendin e dytë
Në garën për vendin e dytë janë Frosinone dhe Monza. Frosinone kryeson me tre pikë më shumë (78 me 75). Pas humbjes së skuadrës brianzole në Mantova, “Ciociari-t” janë vetëm një pikë larg titullit dhe ngjitjes direkte. Mantova do të vizitojë ekipin e Massimiliano Alvinit, i cili duhet të shmangë humbjen. Nëse Monza e Paolo Biancos fiton në shtëpi ndaj Empolit dhe Frosinone humbet, të dyja ekipet do të përfundonin me pikë të barabarta, por Monza do të ngjitej direkt falë avantazhit në ndeshjet direkte (1-0 dhe 2-2). Në rastin më të keq, Monza do të hyjë në “play-off” si vendi i tretë, çka i jep privilegjin të luajë ndeshjet e kthimit (gjysmëfinale dhe finale) në fushën e vet.
Zona “Play-off”
Avellino është kandidati kryesor për vendin e tetë, pasi pret Modenën, e cila nuk ka më objektiva renditjeje. Cesena (ndaj Padovës) dhe Mantova (në Frosinone) kanë pikë të barabarta (46), ndaj u duhet fitorja dhe shpresa te një hap i gabuar i rivalëve. Në rast barazimi të trefishtë me pikë, renditja speciale favorizon Avellinon.
Cesena kualifikohet nëse përfundon me pikë të barabarta vetëm me Avellinon.
Avellino kualifikohet nëse përfundon me pikë të barabarta vetëm me Mantovën.
Mantova kualifikohet nëse përfundon përpara të tjerëve në rast barazimi me Cesenën.
Më pas vijnë skuadrat me 44 pikë, Carrarese dhe Sampdoria, si dhe Padova me 43 pikë, të cilat kanë shanse minimale dhe varen tërësisht nga rezultatet e kundërshtarëve.
Ethet e mbijetesës: “Play-out” dhe rënia
Për momentin, çifti i “play-out”-it për të shmangur Serie C është Bari-Entella. Ligurianët kanë dy pikë avantazh (39 me 37), gjë që u garanton ndeshjen e kthimit në shtëpi. Bari do të luajë në transfertë te Catanzaro, një fushë ku nuk fiton prej vitit 1977.
Bari me një barazim siguron “play-out”-in dhe dërgon automatikisht Pescarën, Spezian dhe Reggianën.
Me një humbje, Bari rrezikon rënien direkte nëse Pescara fiton (pasi abruzët kanë avantazhin në ndeshjet direkte).
Me një fitore, Bari mund të shpëtojë direkt nëse Empoli dhe Sudtirol gabojnë.
Nëse Bari, Empoli dhe Entella përfundojnë të gjitha me 40 pikë, Bari shpëton direkt, ndërsa dy të tjerat luajnë në “play-out”. Ekziston edhe skenari ku “play-out”-i nuk zhvillohet fare: nëse diferenca mes vendit të 16-të dhe të 17-të shkon mbi 4 pikë, skuadra e katërt nga fundi bie direkt.
Shpresa e fundit për Pescara, Spezia dhe Reggiana
Në fund të tabelës, Pescara, Spezia dhe Reggiana (të gjitha me 34 pikë) janë tre pikë pas Barit. Pescara dhe Spezia do të përballen me njëra-tjetrën në një “finale” dramatike në bregdetin adriatik. Të treja këto ekipe duhet patjetër të fitojnë dhe të shpresojnë që Bari të humbasë në Kalabri. Megjithatë, nëse Bari merr qoftë edhe një pikë, këto tre skuadra do të përfundojnë zyrtarisht në Serie C.
Top Channel
