Investigimi/ Rrugët kryesore të Mbretërisë së Bashkuar të mbushura me drogë, shitet lirisht nëpër mini-markete 23/04 10:56
Bisedimet për armëpushim mes Izraelit dhe Libanit do të vijojnë edhe sot në Uashington, në një përpjekje për të shmangur përshkallëzimin e mëtejshëm të konfliktit.
Negociatat në nivel ambasadorësh nisën një ditë më parë, të ndërmjetësuara nga Shtetet e Bashkuara, ndërsa armëpushimi 10-ditor pritet të skadojë të dielën, më 26 prill.
Sipas raportimeve, delegacioni libanez ka hyrë në bisedime me synimin për të zgjatur armëpushimin e brishtë deri në një muaj, si dhe për të hapur rrugën drejt negociatave më të thelluara.
Nga ana tjetër, ministri i Jashtëm i Izraelit, Gideon Sa’ar, i ka bërë thirrje Bejrutit të bashkëpunojë kundër Hezbollahut, të cilin e cilësoi si “shtet terrorist brenda territorit libanez”. Megjithatë, ai theksoi se mes dy vendeve “nuk ka mosmarrëveshje serioze”. Zhvillimet diplomatike vijnë në një moment tensioni të lartë, pasi një gazetar libanez u vra pas një sulmi izraelit në Liban një ditë më parë.
Autoritetet në Bejrut akuzuan Izraelin për “krime kundër njerëzimit”, duke rritur më tej përplasjet politike dhe diplomatike mes palëve. Pavarësisht armëpushimit, si Izraeli ashtu edhe Hezbollahu kanë vijuar me sulme sporadike ndaj njëri-tjetrit.
Izraeli mban kontroll në jug të Libanit deri në lumin Litani, duke synuar krijimin e një zone tampon për sigurinë e tij, ndërsa Hezbollahu e kundërshton ashpër këtë prani. Ndërkohë, brenda Libanit ka përçarje, pasi qeveria kërkon çarmatimin paqësor të Hezbollahut, ndërsa vetë grupi ka kritikuar hapur bisedimet me Izraelin.
Armiqësitë mes palëve u rikthyen më 2 mars, kur Hezbollahu ndërmori sulme në mbështetje të Iranit, në kuadër të tensioneve më të gjera rajonale.
Tashmë, bisedimet e ndërmjetësuara nga SHBA-të synojnë të vendosin një marrëveshje më të qëndrueshme dhe t’i japin fund luftimeve në kufirin Izrael-Liban.
Top Channel
