Manchester City ka siguruar shërbimet e Antoine Semenyo-s, duke realizuar nënshkrimin më të bujshëm të merkatos së janarit në Premier League. Drejtori sportiv Hugo Viana po finalizon detajet e fundit me Bournemouth për aktivizimin e klauzolës së lirimit prej 75 milionë eurosh të përfshirë në kontratën e sulmuesit 25-vjeçar.
Semenyo ka shënuar nëntë gola këtë sezon në kampionat, para përballjes Chelsea–Bournemouth, dhe konsiderohet një nga lojtarët më në formë të Premier League. Klauzola e lirimit është aktive nga 1 deri më 10 janar, ndërsa data e saktë e largimit të ganezit të lindur në Londër mbetet një nga pikat e fundit për t’u dakordësuar mes dy klubeve dhe lojtarit.
Bournemouth kërkon ta mbajë për ndeshjet kyçe
Fillimisht, Bournemouth kishte shpresuar ta mbante Semenyon në huazim deri në fund të sezonit, por kjo zgjidhje u kuptua shpejt se nuk ishte e realizueshme. Megjithatë, “Qershitë” synojnë ta kenë në dispozicion lojtarin e tyre më të mirë të këtij sezoni për të paktën dy ndeshjet e ardhshme në shtëpi: kundër Arsenalit më 3 janar dhe kundër Tottenhamit më 7 janar, kjo e fundit në ditën e 26-të të lindjes së sulmuesit.
Nga ana tjetër, Manchester City do të preferonte që Semenyo të vihej menjëherë në dispozicion të Pep Guardiolës, me synimin për ta aktivizuar që në ndeshjen e 4 janarit në “Etihad” kundër Chelseat. Megjithatë, data e transferimit nuk përbën pengesë për mbylljen e marrëveshjes.
City fiton garën, rivalët tërhiqen
Manchester City ka mbetur i vetëm në garë për Semenyon, pasi Tottenham, Manchester United dhe së fundmi edhe Liverpool janë tërhequr një nga një. Rrethi i afërt i lojtarit e ka bërë të qartë se preferenca absolute e tij ishte puna nën drejtimin e Guardiolës.
Semenyo iu bashkua Bournemouth në janar të vitit 2023 nga Bristol City, klubi ku u formua si futbollist. Ai rinovoi kontratën gjatë verës, por me një klauzolë lirimi prej 75 milionë eurosh, e cila hyn në fuqi vetëm në 10 ditët e para të janarit. Me nëntë gola dhe tre asistime në 17 ndeshje të Premier League, dhe me Bournemouth më afër zonës së rënies sesa objektivave evropiane, aktivizimi i kësaj klauzole shihet si një marrëveshje e favorshme sipas standardeve të kampionatit anglez.
Lëvizje të mundshme në dalje
Manchester City po pret zyrtarizimin e Semenyo-s përpara se të marrë vendime për largime të mundshme. Kandidati kryesor për t’u larguar është Oscar Bobb, anësori norvegjez 22-vjeçar, i cili ka nevojë për më shumë minuta pas rikthimit nga një dëmtim i rëndë. Bobb ka regjistruar nëntë paraqitje në Premier League këtë sezon, pesë prej tyre si titullar, ndërsa në muajin e fundit ka luajtur vetëm 18 minuta në Kupën Carabao kundër Brentfordit, përpara se të ndalej sërish nga një dëmtim.
Borussia Dortmund raportohet se ka shfaqur interes për norvegjezin, por çdo bisedë konkrete pritet të nisë vetëm pas zyrtarizimit të transferimit të Semenyo-s. Ndërkohë, Savinho dhe Omar Marmoush, dy sulmues të tjerë me minuta të kufizuara, nuk janë në listën e largimeve të Manchester City-t në këtë merkato dimërore.
Top Channel
