Detaje të reja janë zbuluar nga plagosja e personazhit të njohur të TikTok-ut, Fabin Kuçi, i njohur ndryshe si “Gucci”.
Sipas njoftimit zyrtar të policisë, hetimet janë në vijim, ku dyshohet se tre shtetas janë afruar me dy automjete rreth orës 23:45 të datës 15 dhjetor 2025, te lokali në lagjen nr. 9, ku qëndronte 33-vjeçari, dhe kanë qëlluar me armë zjarri drejt tij.
Si pasojë e sulmit, Fabin Kuçi ka pësuar dëmtime të lehta. Policia po punon për zbardhjen e plotë të ngjarjes dhe identifikimin e autorëve të mundshëm.
“Në vijim të informacionit të dhënë dje, mbi plagosjen me armë zjarri të shtetasit F. K., sqarojmë se si rezultat i veprimeve të thelluara hetimore, të kryera me qëllim zbardhjen e plotë të autorësisë dhe rrethanave të këtij rasti, u identifikuan dhe u shpallën në kërkim shtetasit:
A. N., 38 vjeç, banues në Durrës, F. B., 22 vjeç, banues në Tiranë dhe B. Ç., 34 vjeç, banues në Durrës.
Nga këto veprime dyshohet se këta 3 shtetas, rreth orës 23:45 të datës 15.12.2025, janë afruar me 2 automjete, te lokali në lagjen nr. 9, ku qendronte shtetasi F. K., dhe kanë qëlluar drejt tij, me armë zjarri. Si pasojë, shtetasi F. K. është dëmtuar lehtë”, njofton policia.
Top Channel
