Një plagosje me armë zjarri ka ndodhur pak pas mesnate në qytetin e Beratit.
Ngjarja ka ndodhur në lagjen Kombinat ku i plagosur ka mbetur Fabiel Xhindi (Toska).
Policia ka marrë njoftimin kur në spital është paraqitur i plagosuri i shoqëruar nga shoku i tij.
Nga informacionet e mara dyshohet se 37-vjeçari është përfshirë në një debat verbal me persona të tjerë, ku pasi ka dalë nga makina një person ende i pa identifikuar e ka qëlluar me armë dhe është larguar.
37-vjeçari Xhindi nuk pranon të flas me policinë dhe të identifikojë personat e përfshirë në debat.
Fabiel Xhindi njihet si person përfshirë në rrjetin e narko-trafikëve në Gjermani dhe Belgjikë.
Nga informacionet e mara mësohet se 37-vjeçari kishte rreth 10 ditë që ishte kthyer nga jashtë.
“Rreth orës 00:55, është dërguar në spital për ndihmë mjekësore shtetasi F. T. (Xh)., 37 vjeç, banues në Berat, i plagosur me armë zjarri në rrethana ende të paqarta, në hyrje të qytetit.
37-vjeçari ndodhet jashtë rrezikut për jetën.
Menjëherë është ngritur grupi hetimor, nën drejtimin e Prokurorisë, vijojnë intensivisht hetimet për zbardhjen e rrethanave dhe sigurimin e provave, me qëllim dokumentimin ligjor të ngjarjes, identifikimin dhe kapjen e autorit/ve”, njofton policia.
Top Channel
