Sheffield Wednesday është goditur me një tjetër dënim të rëndë nga EFL, duke humbur gjashtë pikë të tjera në kampionat, pavarësisht se tashmë ndodhej në kuotë negative.
Dënimi e çon ekipin nga -4 në -10 pikë, duke e thelluar edhe më shumë krizën e klubit.
Skuadra e fundit e Championship-it ishte dënuar më herët me 12 pikë pas futjes në administrim në tetor. Me penalizimin e ri, situata bëhet dramatike: Sheffield Wednesday tani ndodhet 27 pikë larg zonës së mbijetesës, ku Swansea City mban vendin e 21-të me 17 pikë. Madje, klubi është 23 pikë pas Norwich City, skuadra e vendit të parafundit.
Në deklaratën e EFL thuhej: “Sheffield Wednesday FC do të dënohet me gjashtë pikë me efekt të menjëhershëm për shkelje të shumta të rregulloreve të EFL që lidhen me detyrimet e pagesave. Ish-pronari i klubit, Dejphon Chansiri, ndalohet të jetë pronar apo drejtor i ndonjë klubi të EFL për tre vjet.”
Sipas EFL, sanksionet u vendosën pasi palët ranë dakord për masën disiplinore dhe vendimi u ratifikua nga kreu i komisionit të pavarur.
Në mes të krizës së thellë financiare dhe sportive, Sheffield Wednesday ka marrë një ofertë nga ish-pronari i Newcastle United, Mike Ashley, i cili raportohet se ka paraqitur një propozim prej rreth 20 milionë paundësh për blerjen e klubit. Administrata e klubit ka konfirmuar gjithashtu se dy konsorciume amerikane kanë bërë oferta serioze dhe janë konsideruar kandidatë të besueshëm për marrjen e klubit.
Një nga ofertat e paraqitura ka shkaktuar shqetësim të madh, pasi raportohet se përfshin idenë e bashkimit të Sheffield Wednesday dhe Sheffield United – një skenar që do të zemëronte jashtëzakonisht tifozët për shkak të rivalitetit historik midis dy klubeve të qytetit.
Me -10 pikë dhe një të ardhme të pasigurt financiare, Sheffield Wednesday përballet me një situatë të pashpresë dhe duket e destinuar për rënien në League One nëse kriza nuk zgjidhet shpejt.
Top Channel
