Ndihmat humanitare për Palestinën, Gjykata Ndërkombëtare e Drejtësisë do të shqyrtojë detyrimet e Izraelit ndaj OKB-së 22/10 14:41
Kryeministrja italiane, Giorgia Meloni, ka përsëritur në Senat se Italia ka qenë dhe do të mbetet në anën e Ukrainës gjatë kësaj lufte, me qëllim arritjen e paqes “të drejtë dhe të qëndrueshme”.
Ajo u shpreh se vendi i saj nuk do të dërgojë ushtarë në territorin ukrainas, por sërish shprehu mbështetjen për Ukrainën.
“Më lejoni edhe një herë të përsëris qartë qëndrimin e qeverisë: çdo komb do të kontribuojë në përpjekjet për Kievin, por Italia tashmë e ka bërë të qartë se nuk planifikon të dërgojë ushtarë në territorin ukrainas.
Qëndrimi ynë mbetet i pandryshuar dhe nuk mund të ndryshojë, duke pasur parasysh viktimat civile dhe imazhet e shtëpive të bombarduara sistematikisht nga rusët, dhe popullsinë civile që ka rezistuar për katër vjet tani.
Mbështetja jonë për popullin ukrainas mbetet e vendosur, me qëllimin e vetëm për të arritur paqen; madje ia thashë Zelensky-t këtë në telefon disa ditë më parë“, tha Meloni gjatë fjalimit të saj përpara Këshillit Evropian.
Sa i përket luftës në Gaza, Meloni u shpreh se grupi militant i Hamasit duhet të çarmatoset.
“Shkelja e armëpushimit nga Hamasi tregon edhe një herë se kush është armiku i vërtetë i palestinezëve, por ne nuk pajtohemi me reagimin e Izraelit. Plani i Presidentit Trump njeh të drejtën e vetëvendosjes palestineze.
Por Hamasi duhet të pranojë se nuk do të ketë asnjë rol në qeverisjen kalimtare dhe shtetin e ardhshëm palestinez. Dhe duhet të çarmatoset. Këto janë kushtet për njohjen e shtetit të Palestinës, qeveria është gati të veprojë në përputhje me rrethanat kur këto kushte të materializohen”, u shpreh ajo.
Top Channel
