Gola dhe surpriza ndodhën këtë mbrëmje në Kualifikueset e Botërorit 2026, ku ekipe “Big” zbritën në fushë.
Vëmendja ishte te Gjermania në Grupin A, me “Panzerat” që nuk kanë kaluar momente të mira kohët e fundit. Gjithsesi, të besuarit e Nagelsmann nuk gabuan kundër Luksemburgut, duke triumfuar me rezultatin 4-0 dhe duke marrë kreun e grupit. Në duelin tjetër, Irlanda e Veriut mundi 2-0 Sllovakinë, duke u ngjitur e dyta.
Në Grupin B, Zvicra vijon me rrugën e fitoreve. Një penallti e shënuar në gol nga ana e Granit Xhakës dhe goli i Manzambi në fund, i dhanë tri pikët e radhës “helvetëve” në transfertën e Suedisë, një fitore që i bën nder edhe Kosovës në vendin e dytë.
Në rrugën e fitoreve vijon dhe Franca, që kryeson me pikë të plota Grupin D. Mbappe, Rabiot dhe Thauvin ishin protagonistët e “Gjelave” në fitoren 3-0 kundër Azerbajxhanit, me të besuarit e Deschamps që ecin të sigurt drejt Botërorit.
Spektakli ishte garantuar për takimin tjetër të këtij grupi, me Ukrainën që mundi në transfertë Islandën me rezultatin 3-5.
Surpriza më e madhe erdhi nga Grupi J, me Maqedoninë e Veriut që ende nuk njeh asnjë humbje. Ekipi i drejtuar nga trajneri Milevski mori një barazim të rëndësishëm kundër Belgjikës në Gent, duke udhëhequr kështu grupin me 12 pikë dhe duke u bërë një pretendent për kualifikimin në Botëror.
Në takimin tjetër të kësaj sfidë, e cila u luajt në orën 16:00, Kazakistani mundi Lihtenshteinin me rezultatin 4-0.
REZULTATET:
GRUPI A
Gjermani 4-0 Luksemburg
Irlandë e Veriut 2-0 Sllovaki
GRUPI B
Suedi 0-2 Zvicër
Kosovë 0-0 Slloveni
GRUPI D
Francë 3-0 Azerbajxhan
Islandë 3-5 Ukrainë
GRUPI J
Belgjikë 0-0 Maqedoni e Veriut
Kazakistan 4-0 Lihtenshtein
Top Channel
