Trump dha propozimin për luftën në Gaza, reagon për herë të parë Hamasi: Plani favorizon Izraelin, do përgjigjemi sapo… 29/09 22:44
Në kundërshtim me narrativën e shumëtrumpetuar nga propaganda ruse, Ukraina deri më tani e ka fituar luftën: Për këtë, analisti dhe filozofi i njohur Yuval Noah Harari duket i bindur.
Në një editorial të publikuar nga Financial Times, ai i bën një grafi të përmbledhur të gjithë situatës së konfliktit mbi tre vjecar. Në mbështetje të pretendimeve të veta, sjell si shembull edhe rastin e vetë presidentit amerikan Donald Trump, i cili shkurtin e këtij viti i mbajti një leksion Presidentit ukrainas Volodymyr Zelenskyy duke i treguar se duhet t’i nënshtrohet kërkesave ruse sepse “Kievi nuk i ka letrat e duhura” për të fituar, ndërsa tani së fundi vetë republikani e ktheu pllakën, duke pohuar se “Ukraina, me mbështetjen e Bashkimit Evropian, është në pozicion për të luftuar dhe për të Triumfuar”.
Harari bën dallimin mes gjendjes sot, dhe fillesave të konfliktit kur Kievi dukej plotësisht i pafuqishëm përballë agresionit të Moskës, apo lehtësisë me të cilën rusët morën Krimenë dhe pjesë të tjera të Ukrainës lindore. Lufta hyri në një fazë më intensive më 24 shkurt 2022, kur Rusia ndërmori një sulm të plotë, duke synuar të nënshtronte të gjithë Ukrainën dhe t’i jepte fund ekzistencës së saj si një komb i pavarur. Në atë kohë, udhëheqja ruse dhe shumë vëzhgues në të gjithë botën prisnin që Rusia ta pushtonte Kievin dhe të mposhtte ushtrinë ukrainase brenda vetëm disa ditësh.
Edhe vetë mbështetësit perëndimorë të Ukrainës ishin aq të pasigurt për shanset e rezistencës së saj saqë ofruan të evakuonin Presidentin Zelenskyy dhe ekipin e tij dhe t’i ndihmonin ata të krijonin një qeveri në mërgim. Por Volodimir Zelensky zgjodhi të qëndronte në Kiev dhe të luftonte, duke u thënë amerikanëve, “Më duhen municione, jo një shëtitje”. Forcat ukrainase të pakta në numër e tronditën botën duke zmbrapsur sulmin rus ndaj Kievit.
Ushtria ukrainase u hodh në kundërsulm në fund të verës së vitit 2022, korri dy fitore të mëdha në rajonet e Kharkiv dhe Kherson, dhe çliroi pjesën më të madhe të territorit të pushtuar nga rusët në fazën e parë të pushtimit të tyre. Që atëherë, pavarësisht avancimeve të kufizuara nga të dyja palët, në thelb, vija e frontit nuk ka lëvizur shumë, vëren Harari. Pavarësisht se rusët përpiqen të krijojnë përshtypjen se janë duke avancuar pa pushim, fakti mbetet se, që nga pranvera e vitit 2022, ata nuk kanë arritur të marrin më asnjë objektiv me rëndësi të madhe strategjike, e Rusia ka dështuar edhe në ajër gjithashtu.
Askush nuk e di me saktësi se sa njerëz të tjerë do të vdesin për shkak të iluzioneve dhe ambicieve të Putinit, vazhdon Harari, por botës tashmë i është bërë e qartë se Ukraina është një komb shumë real dhe se miliona ukrainas janë të gatshëm të luftojnë me mish e me shpirt për të mbetur të pavarur nga Rusia.
Top Channel
