Papa Leoni pret në Vatikan presidentin izraelit, Herzog: Jemi të përkushtuar për mbrojtjen e komuniteteve të krishtera në Tokën e Shenjtë 04/09 14:12
Zëvendëskryeministrja britanike Angela Rayner përballet me hetim për taksat, ndërsa jeta e saj personale kthehet në temë të nxehtë për mediat dhe politikën.
Nga një letër për këpucë te një hetim për miliona
Në vitin 2015, vetëm pak muaj pasi ishte zgjedhur deputete, Angela Rayner u gjend në titujt e gazetave për një letër zyrtare që u dërgoi një dyqani këpucësh. Arsyeja? Një palë taka në formën e robotit R2-D2 nga Star Wars. Shumë e panë si një reagim të ekzagjeruar dhe përdorim të papërshtatshëm të letrës parlamentare.
Asokohe, Rayner, 35 vjeç, tha se nuk kishte bërë asgjë të gabuar dhe vazhdoi pa u ndëshkuar. Sot, ajo përballet me një çështje shumë më serioze: hetim për mosshlyerjen e plotë të taksës së pronës (stamp duty) për një apartament prej 800 mijë paundësh në Hove.
Ngjitja e shpejtë dhe imazhi i fortë
Historia e saj personale, fëmijëria në varfëri, adoleshente nënë dhe rritja në një familje problematike, e ndihmoi të krijonte një profil unik në politikën britanike. Brenda pak vitesh ajo arriti të bëhej një nga figurat më të fuqishme të Partisë Laburiste, duke fituar postin e nënkryetares dhe duke ruajtur imazhin e një zëri autentik të klasës punëtore.
Por kjo histori suksesi kishte edhe anën e saj të brishtë: Rayner gjithmonë ka qenë e vendosur të mbrojë jetën private, sidomos fëmijët, sigurinë personale dhe lidhjet sentimentale.
Historia me Sam Tarry dhe presioni mbi Starmer
Pas ndarjes nga bashkëshorti, Rayner nisi një lidhje me ish-deputetin dhe sindikalistin Sam Tarry. Marrëdhënia e tyre, e luhatshme dhe shpesh në qendër të spekulimeve, lidhej drejtpërdrejt me vendimin e saj për të blerë shtëpi në Brighton, qindra kilometra larg zonës së saj elektorale.
Tarry u konsiderua shpesh si figurë problematike nga ekipi i Keir Starmer, pasi përballjet e tij publike me lidershipin e Laburistëve e vendosnin edhe Rayner në pozitë të vështirë.
Nga privatja në publike
Në të kaluarën, Rayner ka ditur të kalojë me humor apo me vendosmëri akuzat mediatike. Por këtë herë është ndryshe. Hetimi për taksat dhe pyetjet mbi lidhjen e saj e kanë çuar kufirin mes jetës private dhe publike drejt prishjes përfundimtare.
Për një politikane që e ka ndërtuar fuqinë mbi autenticitetin dhe mbrojtjen e jetës personale, ky mund të rezultojë testi më i madh i karrierës së saj.
Top Channel
