Mashtrime me abonimin Prime? Amazon bën gati miliardat për t’i shpëtuar gjyqit 25/09 22:39
Një aksident tragjik ndodhi mbrëmjen e së mërkurës në Lisbonë, kur tramvaji i famshëm Gloria, një transportues i njohur turistik që lëviz nëpër kodrat e kryeqytetit portugez, doli nga shinat.
Sipas mediave, të paktën 15 persona humbën jetën, ndërsa 20 të tjerë u plagosën, disa prej tyre në gjendje serioze.
Shkak i aksidentit u bë çarja e njërit prej kabllove që mbështet tramvajin, duke shkaktuar humbjen e kontrollit dhe përplasjen me një ndërtesë. Pamjet nga vendngjarja tregojnë tramvajin të shkatërruar dhe punonjësit e emergjencës duke nxjerrë të plagosurit nga rrënojat.
Një dëshmitare, Teresa d’Avo, tha për kanalin televiziv portugez SIC: “U përplas me ndërtesën me forcë të jashtëzakonshme dhe u shkatërrua si një kuti kartoni. Nuk kishte fare frenim.”
Fillimisht, policia lokale kishte konfirmuar tre të vdekur dhe rreth 20 të plagosur, por raportimet e fundit të CNN Portugal kanë rritur bilancin tragjik në të paktën 15 viktima. Shtatë nga të plagosurit janë në gjendje kritike dhe po marrin trajtim intensiv në spitalet e Lisbonës.
Autoritetet dhe shërbimet e emergjencës vazhdojnë operacionet për të nxjerrë të mbijetuarit dhe për të siguruar zonën. Funikulari Gloria, një simbol turistik i Lisbonës, ka qenë ndër mjetet më të përdorura për vizitorët që duan të eksplorojnë lagjen Barrio Alto dhe qendrën e qytetit.
Presidenti i Portugalisë, Marcelo Rebelo de Sousa, ka shprehur ngushëllimet më të thella për viktimat dhe familjet e tyre, duke theksuar rëndësinë e hetimit të plotë për të zbuluar shkaqet e aksidentit.
Top Channel
