“Berisha të largojë humbësit”, Dash Sula: Duhet analizë, parashikoj situatë më të keqe për Partinë Demokratike

Pastrimin e shtëpisë që premtoi kur doli nga izolimi, doktori e nisi me të vetët duke larguar rebelët. Si njëri prej tyre, Sula mendon se ka ardhur koha që Berisha të largojë humbësit.

“Pa diskutim duhet një analizë e hollësishme, drejtuesit e qarqeve kanë përgjegjësinë e parë, pa diskutim sekretari i Përgjithshëm, pa diskutim figurat e tjera sipas rezultateve, më pas dhe zoti Berisha ka përgjegjësinë e tij. Nëse do vazhdojnë po këto figura, nga sekretari i përgjithshëm, nënkryetarët dhe kryetari i grupit etj, do të vijojë po kjo statusquo ta mbajnë, ta gëzojnë dhe në zgjedhjet e tjera unë parashikoj një situatë akoma më të keqe për Partinë Demokratike”, u shpreh Dash Sula në një intervistë për Top Channel.

Ish ligjvënësi demokrat është i mendimit që shërbimi më i mirë që Sali Berisha mund t’i bënte partisë është riformatimi i thellë, për ti hapur rruge një lidershipi të ri.

”Sepse do duhet të kemi një model të ri dhe ndryshe në përballje me PS dhe Edi Ramën që do te thotë nëse do vijohet po me këto figura që kemi sot nuk mundet Rama dhe PS. Do te thotë qe duhen burra dhe gra që te dalësh para shqiptareve tu thuash ky jam unë, modeli ndryshe nga kundërshtari im që kam përballë”, tha Sula.

Një lëvizje e re që nis me një foltore është paralajmëruar. Dash Sula tregon kushtin që ka për t’iu bashkuar.

“Nëse do kemi një lëvizje që do ta marrin figura të tjera për të shpëtuar Partinë Demokratike, do kenë qasje tjetër në raport me problematikat që ka PD, sigurisht do ta mbështesja dhe do thosha që ia vlen ta mbështesësh, por nëse do jetë analizë empirike që do të iki nga qendra në bazë, që ti dëgjojnë dhe të shkruajnë, ca do të shkruajnë dhe do të kthehen prap në bazë, kjo nuk ka vlerë”, u shpreh ish-deputeti i PD-së.

Ish deputeti demokrat pret që lëvizja e re të sjellë përmbysje në Partinë Demokratike, ku ata që grumbulluan vota më shumë,  të vlerësohen dhe të ngjiten në krye të partisë.

Top Channel