Video/ Trofeu i parë pas 17 vitesh, Tottenham fiton në Bilbao dhe ngre për herë të tretë Ligën e Europës! Sezon i dështuar për Man. United 21/05 22:59
Pesë persona janë dënuar me burgim me kusht për abuzim racist ndaj sulmuesit të Real Madridit, Vinicius Jr, në një vendim të cilësuar si “të paprecedentë” nga La Liga.
Ky është rasti i parë në Spanjë që fyerjet raciste në një stadium futbolli ndëshkohen si krim urrejtjeje.
Ngjarja ndodhi në shtator të vitit 2022, gjatë një ndeshjeje kundër Real Valladolid, ku Vinicius, atëherë 22 vjeç, u bë objekt i abuzimeve raciste teksa po largohej nga fusha në stadiumin Jose Zorrilla.
Gjykata Provinciale e Valladolidit i dënoi pesë personat me një vit burg, por vendimi është pezulluar me kusht që të mos kryejnë vepra të tjera penale për një periudhë trevjeçare. Po ashtu, atyre u është ndaluar pjesëmarrja në ndeshje futbolli gjatë kësaj kohe dhe janë gjobitur me shuma që variojnë nga 1,080 deri në 1,620 euro.
Në një deklaratë zyrtare, La Liga u shpreh se ky vendim është rezultat i përpjekjeve të saj, duke qenë nismëtarja e padisë penale, të cilës më vonë iu bashkuan edhe vetë lojtari, klubi Real Madrid dhe Zyra e Prokurorit Publik.
“Ky vendim përfaqëson një moment të rëndësishëm në luftën kundër racizmit në sport në Spanjë, duke vendosur një precedent të ri ligjor,” thuhet në deklaratën e La Liga-s. “Fakti që gjykata e ka cilësuar këtë si krim urrejtjeje, e jo thjesht si fyerje ndaj integritetit moral, është një mesazh i qartë se intoleranca nuk ka vend në futboll.”
Vinicius Jr ka qenë disa herë objekt i abuzimeve raciste gjatë karrierës së tij në Spanjë. Në një reagim publik në qershor 2024, ai kishte thënë:
“Nuk jam viktimë e racizmit. Unë jam një torturues i racistëve,” duke iu referuar një rasti tjetër ku tre tifozë të Valencias u dënuan me tetë muaj burg për abuzim racist ndaj tij në maj 2023.
Top Channel
