“Amerika nuk ka nevojë për një mbret”/ Shpërthejnë protestat në SHBA dhe Evropë kundër tarifave të Trump
05/04 22:26
Tregjet e aksioneve në SHBA mbyllën javën e tyre më të keqe që nga pandemia e Covidit në vitin 2020, teksa tarifat gjithëpërfshirëse të Donald Trump vazhdojnë të shkaktojnë trazira në bursat anekënd globit.
Të treja indekset kryesore në Wall Street ranë me më shumë se 5%. Këmbëngulja e Trumpit se taksat mbi mallrat që hyjnë në SHBA do t’i japin një super-impuls ekonomisë amerikane, nuk ka ndihmuar në qetësimin e investitorëve. Presidenti përdori rrjetin e tij social, Truth, për të përcjellë mesazhin se gjendja është nën kontroll.
“Për investitorë të shumtë që vijnë në SHBA dhe investojnë shuma masive parash, politikat e mia nuk do të ndryshojnë kurrë. Kjo është një kohë e mirë për t’u pasuruar, më të pasur se kurrë më pare”, tha Trump.
Komentet e tij vijnë në kohën kur ndërsa tregjet globale të aksioneve ranë për të dytën ditë pas planit të tij tarifor dhe masave hakmarrëse të Kinës. Trump u shpreh se Kina “luajti gabim” duke i kundërpërgjigjur SHBA-së me tarifa shtesë. Pekini iu përgjigj tarifës prej 34% të Trump me taksën e vet me të njëjtën përqindje për importet amerikane. Masave të Washingtonit nuk i shpëtoi as partnerja e tij e hershme tregtare, Britania e Madhe.
Teksa tarifa prej 10% hyri në fuqi edhe për Anglinë, kryeministri Keir Starmer pritet ta kalojë fundjavën duke diskutuar me liderë të tjerë të huaj mbi lëvizjet që duhet të ndërmarrin. Ai ka folur tashmë në telefon me homologët nga Australia e Italia, por po kërkon të tregohet i kujdesshëm në reagim. Nga sa pohoi Downing Street, të tre udhëheqësit kanë rënë dakord me idenë se një luftë e hapur tregtare nga të gjitha palët, do të shkaktonte dëme të jashtëzakonshme.
Top Channel
