Digjen gjatë natës dy automjete të parkuara në Durrës, policia: Flakët përshinë njërën prej tyre, më pas…

09/07/2024 08:44

Dy automjete janë djegur gjatë natës në Durrës, teksa ndodheshin të parkuara në rrugë, tek ish- URT.

Sipas informacioneve të siguruara nga gazetarja e Top Channel, Vali Qyrfyçi, një prej automjeteve të djegura i përket kryeinxhinierit të OSHEE-së Durrës.

“Në orët e para të mëngjesit, në lagjen nr. 17, në automjetin tip “Benz” të parkuar, në pronësi të shtetasit A. A., ka rënë zjarr. Si pasojë e përhapjes së flakëve është djegur dhe një automjet tjetër, në pronësi të shtetasit E. H., që ishte i parkuar pranë automjetit tip “Benz””, thuhet në njoftimin e policisë.

Ndër të tjera dyshohet të jetë zjarrvënie e qëllimshme, ndërsa grupi hetimor në drejtimin e Prokurorisë, vijon punën për zbardhjen e rrethanave dhe përcaktimin e shkakut të rënies së zjarrit.

Top Channel