![](https://top-channel.tv/wp-content/uploads/2024/09/MixCollage-07-Sep-2024-05-33-PM-5997-800x450.jpg)
Kompania Saudia Group do të blejë 105 avionë pasagjerësh Airbus, teksa ngrinte lart marrëveshjen si më të madhen e avionëve në historinë e vendit.
Kompania saudite e fluturimeve do të marrë 54 avionë tip A321, kurse nën-dega e saj ‘Flyadeal’ do të marrë 12 avionë tip A320neo dhe 39 të tjerë tip A321neo, thuhej në deklaratë.
“Kjo marrëveshje madhore përfshin 105 avionë të konfirmuar dhe është një moment i rëndësishëm për industrinë saudite të aviacionit”.
Zhvillimi vjen teksa autoritetet saudite kanë njoftuar ndërtimin e një aeroporti të ri në kryeqytetin Riad, ku pritet të qarkullojnë 100 milionë pasagjerë në vit.
Përfaqësuesi qeveritar Saleh Eid, tha për rrjetin AFP se dërgesat e avionëve të rinj do të nisin në 2026 e do të vazhdojnë deri në 2032. Ai nuk pranoi të thoshte shumën që do të paguhet për avionët.
Kompania kryesore ajrore e vendit ‘Saudia’ me bazë në Jeddah, daton prej vitit 1945 kur mori avionin e saj të parë , si një dhuratë nga presidenti amerikan Franklin Roosevelt.
Vitin e kaluar Saudia njoftoi gjithashtu marrëveshjen e blerjes së 39 avionëve Dreamliner nga grupi amerikan Boeing, me opsion për dhe 10 avionë të tjerë.
Linja më e madhe ajrore e Lindjes së Mesme është ‘Emirates’ në Emiratet e Bashkuara fqinje, që ka numrin më të madh të pasagjerëve./AFP/
Top Channel