Gjykata e Apelit vendosi të zbusë masën ndaj autorit të aksidentit të ndodhur më 17 mars 2024 me pasojë vdekjen e katër personave dhe plagosjen e dy të tjerëve.
Apeli vendosi ndryshimin e vendimit dhe caktimin e masës së sigurimit “arrest në burg me afat 20 ditor” për autorin E. P..
Çështja u shqyrtua pasi E.P. u ankua duke e vlerësuar të padrejtë “arrestimin në flagrancë” dhe caktimin e një mase sigurimi më të butë.
Aksidenti ndodhi rreth orës 19:00 rreth 300 m larg hyrjes së Tepelenës në by pass-in që devijon qytetin.
Riza Rapaj, 42 vjeç, nga fshati Luftinjë, që udhëtonte me një mjet tip “Benz” nga Tepelena drejt Memaliajt ka kryer një manovër të gabuar, duke u përplasur me mjetin tip “Toyota” që vinte nga drejtimi i kundërt. Brenda Toyotës udhëtonin 5 persona të të njëjtës familje. 42 vjeçari që u bë shkak për aksidentin dhe drejtuesi i mjetit Toyota Lavdosh Bega, 62 vjeç, kanë humbur jetën në vendngjarje.
Më pas u konfirmuan të vdekur gjatë transportit për në spital edhe Lefteri Bega 57 vjeç bashkëshortja e Lavdoshit dhe Afërdita Meta 85 vjeç, nëna e kësaj të fundit.
Të plagosur rëndë brenda të njëjtit mjet mbetën Jani Meta rreth 60 vjeç dhe Lavdie Ismail Meta 61 vjeç familjarë të tyre. Një mjet i tretë tip “BMË” që udhëtonte në të njëjtin sens me “Toyotën” është përfshirë në aksident si pasojë e rrethanave të papritura. Tre persona që udhëtonin brenda mjetit të tretë kanë vetëm dëmtime të lehta. Ata kanë marrë mjekime në spitalin e Gjirokastrës dhe gjenden jashtë rrezikut për jetën. Të plagosurit rëndë janë transportuar drejt spitalit të Traumës në Tiranë.
Nga hetimi paraprak mendohet se shkak për aksidentin është bërë shpejtësia mbi normën e 42 vjeçarit Rapaj, lagështia në rrugë me pasojë rrëshqitjen nga korsia.
Aksidenti mori përmasa dramatike pas përfshirjes në të të mjetit të tretë që për pasojë rriti bilancin e të lënduarve dhe të vdekurve në këtë ngjarje.
Njoftimi i plotë i gjykatës së Apelit.
Referuar raportimeve të mëparshme në media, Gjykata e Apelit të Juridiksionit të Përgjithshëm, informon sa më poshtë:
Çështja nr. 1:
Më datë 17.03.2024, rreth orës 19:10, shërbimet e Policisë Rrugore të Drejtorisë Vendore të Policisë Gjirokastër, janë njoftuar se në rrugën dytësore Tepelenë-Memaliaj, poshtë kalasë së qytetit, kishte ndodhur një aksident rrugor me pasoja të rënda, i dyshuar për këtë aksident është shtetasi me iniciale E. P.
Gjykata e Shkallës së Parë e Juridiksionit të Përgjithshëm Gjirokastër, ka zhvilluar gjykimin lidhur me vlerësimin e ligjshëm të arrestit në flagrancë dhe caktimin e masës së sigurimit personal “arrest në burg”, ndaj personit nën hetim shtetasit me iniciale E. P, i dyshuar për kryerjen e veprës penale “Shkelja e rregullave të qarkullimit rrugor”, të parashikuar nga neni 290/4 i Kodit Penal
Gjykata e Shkallës së Parë të Juridiksionit të Përgjithshëm Tiranë, me vendimin nr. 108, datë 20.03.2024, ka vendosur:
1. Vlerësimin si të ligjshëm të “arrestit në flagrancë” të të dyshuarit E. P, i dyshuar për kryerjen e veprës penale “Shkelje e rregullave te qarkullimit rrugor”, të parashikuar nga neni 290/4 i Kodit Penal.
2. Caktimin ndaj të dyshuarit E. P masën e sigurimit personal “arrest në burg”, parashikuar nga neni 238 i K.Pr.Penale
Çështja në apel u shqyrtua mbi bazën e ankimit të bërë nga personi nën hetim me iniciale E. P, i cili kërkoi ndryshimin e vendimit përsa i përket vlerësimit të masës, duke e vlerësuar të padrejtë “arrestimin në flagrancë”, caktimin e një masë sigurimi më të butë.
Në përfundim të gjykimit, sot më datë 26.04.2024, Gjykata e Apelit të Juridiksionit të Përgjithshëm, e përbërë nga trupi gjykues me Gjyqtar z. Qemal Zaimi, vendosi:
-Miratimin e vendimit penal nr. 108 , datë 20.03.2024 të Gjykates së Shkallës së Parë të Juridiksionit të Përgjithshëm Gjirokastër në lidhje me vlerësimin e ligjshëm të “arrestit në flagrancë” të personit nën hetim E. P.
-Ndryshimin e vendimit në lidhje me masën e sigurimit si më poshtë :
Caktimin e masës së sigurimit “arrest në burg me afat 20 ditor” për personin nën hetim E. P.
Top Channel
