“Shuplakat” e radhës ndaj Barçës, Girona shpall Realin kampion 04/05 20:49
Një 73-vjeçe e quajtur Fatime Zogu ishte e ftuar në “Shqipëria Live” në Top Channel për të treguar pasionin e saj për librat.
Ajo shprehet se një pjesë të mirë të kohës e kalon duke lexuar libra dhe se ato janë bërë pjesë e saj. Madje për shkak të pasionit të saj, djali i shkrimtarit Mitrush Kuteli i ka dorëzuar vetë personalisht të moshuarës përkthimet e të atit.
E moshuara shprehet se dikur lexonte fshehurazi pasi burri i saj ishte xheloz. Sa herë që ai largohej nga shtëpia, nënë Fatime hapte librat dhe lexonte. Ajo shprehet se ka dhe probleme me shikimin, ku me njërin sy nuk shikon fare, por kjo nuk e ka penguar që të lexojë.
Por ajo që bie më shumë në sy në historinë e kësaj të moshuare, është se jeton në kushte të mjerueshme. Jeton prej katër vitesh afër Farkës, në një magazinë, e cila nuk është një shtëpi dhe nuk ka kushte të përshtatshme. Nënë Fatime nuk e ka paguar qiranë për gati një vit dhe se pronarja e saj e cila e ka ndihmuar dhe nuk e ka lejuar të jetojë në rrugë, i ka ulur qiranë nga 100 mijë lekë në 70 mijë lekë.
“Është një barake çfarë bie nga qielli bie në dhomën time. Dje kur jam kthyer në shtëpi e kam gjetur plot ujë”, shprehet e moshuara e cila sapo ka dalë nga spitali.
73-vjeçares i është ofruar një mundësi për të shkuar në një azil, ku ka qenë edhe më herët, por ka pasur disa probleme dhe refuzon të shkojë për arsyet e saj.
E vetmja gjë që kërkon nënë Fatime është të ketë një dhomë të ngrohtë. Ajo nuk përdor asnjë pajisje elektrike sepse ka frikë se mund të shkaktohet zjarr. Kështu ajo detyrohet që të jetojë në të ftohtë. Ka një pension minimalist dhe shprehet se ha vetëm bukë me djathë.
Top Channel
