Kryeministri Edi Rama ndodhet sot në Bruksel, ku po merr pjesë në samitin e Bashkimit Europian dhe Ballkanit Perëndimor, i cili zhvillohet një vit pas samitit të mbajtur më 6 dhjetor në Tiranë, me pjesëmarrjen e liderëve të BE dhe të Ballkanit Perëndimor.
Në nisje të Samitit, Rektorja e Kolegjit të Europës me qendër në Bryzh të Belgjikës, Federica Mogherini dha për të pranishmit lajmin se tashmë Kolegji i Europës do të ketë të parin kampus jashtë vendeve të Bashkimit Europian, pikërisht në Tiranë, duke bërë kështu realitet një ide të diskutuar një vit më parë në Samitin e mbajtur në Tiranë.
Federica Mogherini: Në samitin e Ballkanit Perëndimor në Tiranë që u zhvillua një vit më parë, u ngrit dhe u diskutua ideja. Ju kërkuat që Kolegji i Europës të merrte në konsideratë hapjen e një kampusi në rajon, në Tiranë dhe një vit më pas ne e realizuam atë.Kështu që, mendoj që kjo është një mënyrë shumë e mirë për ta nisur këtë Samit midis BE dhe Ballkanit Perëndimor me lajmin e mirë që diçka që ju diskutuat një vit më parë, sot është realizuar. Është në zhvillim e sipër dhe është duke u bërë!
Së pari, dua të falënderoj Edin, gjithashtu edhe qeverinë shqiptare për mbështetjen e jashtëzakonshme, jo vetëm mbështetjen por dhe entuziazmin. Gjithashtu dhe Komisionin që mobilizoi burimet, Këshillin që e mbështeti dhe shtetet anëtare që sot na çojnë të bëjmë diçka, mjaft të rëndësishme. Sot keni premtime nga 21 shtete anëtare për të mbuluar bursa për studentët qoftë nga rajoni ashtu dhe nga vendet e Ballkanit Perëndimor.
Ndaj besoj se të gjithë studentët, të cilët marrin pjesë, do të ndjekin këto studime, do të kenë edhe bursa në shtator të vitit të ardhshëm kur të kemi masterin tonë për integrim dhe transformim europian. Do të jetë një program master, një diplomë saktësisht si të tjerat e kolegjit të Europës, që do të thotë do të mbartë të njëjtin standard ekselence. Do të akreditojmë programet me autoritetet belge. Vlera do të jetë po njësoj dhe do të punojmë që të bëjmë që studentët tanë të jetojnë së bashku, të fuqizohen së bashku për të formësuar të ardhmen e integrimit europian. Jo vetëm ju falënderoj për këtë, por jam po kështu, këtu, që t’ju sjell ndërmend se çfarë nënkupton ky angazhim.
Trupa jonë mësimore, studentët tanë dhe kam parë të gjithë brezin e ri, jo vetëm në rajon, por edhe në pjesën tjetër të Europës që ka pritshmëri mjaft të mëdha për këtë. Unë mendoj se sot ju investoni në atë brez që do ta bëjë integrimin e Ballkanit Perëndimor në BE realitet dhe nga ana jonë, sigurisht ne angazhohemi që t’ju ofrojmë ekselencën e dijes, të aftësive dhe të krijimit të rretheve që do t’i fuqizojnë ata për ta bërë të mundur këtë gjë dhe jam e sigurt që shtetet anëtare, institucionet dhe po kështu edhe vendet e rajonit do të konfirmojnë me zotimet e sotme, angazhimin për ta shoqëruar këtë proces dhe për ta bërë atë realitet. Kështu që, dua t’ju falënderoj shumë. Do t’ju shoh të gjithëve në Kolegjin e Europës në Tiranë sepse ajo do të jetë dhe shtëpia juaj.
Liderët e BE-së dhe Ballkanit Perëndimor takohen në Bruksel një vit pas samitit të 2022-ës në Tiranë. Samiti është një mundësi për të riafirmuar perspektivën e anëtarësimit në BE të Ballkanit Perëndimor, si dhe nevojën për arritje të qëndrueshme dhe të pakthyeshme të reformave të partnerëve, të mbështetur nga vlerat dhe parimet e BE-së.
Temat kryesore të diskutimit do të jenë:
thellimi i angazhimit politik me Ballkanin Perëndimor;
afrimi i partnerëve të Ballkanit Perëndimor me BE-në dhe avancimi i integrimit gradual;
ndërtimi i bazave ekonomike për të ardhmen dhe zbutja e ndikimit të luftës së agresionit të Rusisë kundër Ukrainës;
përforcimi i sigurisë dhe ndërtimi i qëndrueshmërisë.
Samiti do të jetë një mundësi për të diskutuar veprimet e koordinuara në lidhje me çështjet e sigurisë, të cilat janë bërë edhe më të rëndësishme në kontekstin e agresionit rus kundër Ukrainës. Kjo përfshin luftimin e manipulimit të informacionit të huaj dhe rritjen e sigurisë kolektive kibernetike.
Top Channel
