Disfata me Italinë, Asllani: Më vjen keq për tifozët, donim t’u dhuronim një rezultat pozitiv 15/06 23:35
Java e kulturës hungareze u mbyll në Durrës me një koncert gala me vepra të kompozitorit të mirënjohur botëror Franc List.
Përgjatë një mbrëmjeje ekskluzive muzikore, orkestra simfonike e drejtuar nga dirigjenti Oleg Arapi interpretoi tri kryevepra botërore të kompozitorit Franc List, si Rapsodia nr.2, Tantum Dance (Vallja e vdekjes) dhe poemën simfonike “Prelud”.
“Është një koncert dedikuar kompozitorit F. List që ka dhe 212 – vjetorin e lindjes. Jemi të lumtur që e sjellim këtë program dhe jashtë Tiranës. Ka patur shumë interes nga njerëzit dhe jemi të kënaqur që shumë njerëz i duan këto pjesë. E gjithë orkestra është përzgjedhur nga drejtori artistik Liman Maloku”, tha pianistja Almira Emiri.
Duke vlerësuar marrëdhëniet mes dy vendeve, përfaqësuesi i ambasadës hungareze u shpreh i kënaqur për larminë e aktiviteteve përgjatë ditëve të kulturës hungareze që u zhvilluan në Tiranë, Korçë, Pogradec, Vlorë dhe Durrës. Para publikut durrsak, ai theksoi se Hungaria do të mbajë presidencën e BE-së vitin e ardhshëm dhe një ndër prioritetet e saj do të jetë futja e Shqipërisë në familjen e madhe të Bashkimit Europian.
“Kemi një të kaluar të këndshme, të tashme të bukur e shpresoj që e ardhmja të jetë po ashtu. Vitin tjetër do jetë dhe më bukur pasi Presidenca e BE-së do të jetë e Hungarisë dhe një nga çështjet kyçe është hyrja e Shqipërisë në BE”, tha Adam Lovassy, i ngarkuari në detyrë i Ambasades Hungareze.
Koncerti u duartrokit gjatë nga artdashësit durrsakë dhe ata të ardhur nga Tirana.
Top Channel
