Kryetari i Bashkisë Divjakë, Fredi Kokoneshi është plagosur me thikë këtë të enjte bashkë me shoferin e tij, pas një konflikti me një ish punonjës të bashkisë.
Sipas informacioneve, ai kishte dalë për inspektim në një nga banesat pranë bashkisë së Divjakës në momentin që është konfliktuar me autorin Orges Xhelili.
Teksa kryebashkiaku ishte në inspektim, Xhelili është afruar dhe e ka fyer, ndërsa më pas debati mes tyre ka degraduar në përdorimin e thikës nga ana e autorit.
Me agresorin fillimisht është përleshur shoferi Gazmend Bullari, i cili ishte në gjendje kritike për jetën, pasi mori një plagë në bark, duke i dëmtuar organet jetësore.
Sipas mjekut, gjendja e shoferit është duke u përmirësuar dhe aktualisht ndodhet jashtë rrezikut për jetën.
Kryebashkiaku i Divjakës, Fredi Kokoneshi
Kryebashkiaku u dërgua fillimisht në spitalin e Lushnjës dhe iu nënshtrua një ndërhyrjeje kirurgjikale.
Pas ndërhyrjes kirurgjikale, kryebashkiaku Kokoneshi është paraqitur në gjendje më stabël, gjë e cila i ka lejuar të transportohet drejt Traumës në Tiranë.
Ndërsa shoferi nuk mund u transportua drejt një spitali tjetër, pasi gjendja e tij mund të përkeqësohej ngaqë ka humbur shumë gjak për shkak të plagës së rëndë.
Xhelili dyshohet se ka pasur një konflikt me Fredi Kokoneshin.
Mësohet se Orges Xhelili më herët ka punuar si punonjës IT pranë bashkisë së Divjakës për një periudhë të shkurtër.
Ende nuk janë bërë të qarta plotësisht arsyet e konfliktit mes tyre, ndërsa grupi hetimor pritet të zbardhë rrethanat e ngjarjes.
Autori është kapur dhe shoqëruar në komisariat, ndërsa forca të shumta policie janë në spital, ku ndodhen dy të plagosurit.
“Rreth orës 09:30, në afërsi të bashkisë Divjakë, shtetasi O. Xh., 46 vjeç, dyshohet ka goditur me mjet prerës, shtetasin F. K., me detyrë Kryetar i bashkisë Divjakë dhe shoferin e tij, shtetasin G. B., 45 vjeç. Të dëmtuarit janë transportuar menjëherë dhe po marrin ndihmë mjekësore, në Spitalin Rajonal Lushnjë. Falë veprimeve të shpejta operacionale të shërbimeve të Policisë, është kapur dhe shoqëruar në Komisariat, për veprime të mëtejshme procedurale, shtetasi O. Xh., si autor i dyshuar i plagosjes. Në vendngjarje ndodhen drejtuesit më të lartë të DVP Fier. Grupi hetimor, nën drejtimin e Prokurorisë, po punon për sqarimin e plotë të rrethanave të ngjarjes“, sipas policisë.
Kreu i Grupit Parlamentar të PS, Taulant Balla, kryebashkiaku i Fierit, Armando Subashi dhe krybashkiakja e Lushnjës, Eriselda Sefa kanë vizituar Kokoneshin në spital, pas ngjarjes.
Top Channel
