Tre persona të shpallur në kërkim ndërkombëtar nga Interpol Tirana janë ekstraduar drejt Shqipërisë.
Në vijim të bashkëpunimit me homologët në Kosovë, Kroaci dhe Itali, u bë e mundur ekstradimi i këtyre personave:
-Shpejtim Halimi (Kosovë): i shpallur në kërkim ndërkombëtar nga ZQK Interpol Tirana, pasi Gjykata e Rrethit Gjyqësor Tiranë, me vendimin e datës 21.07.2021, e ka dënuar me 4 vjet burgim për veprën penale “Përndjekja”.
-Aleksander Nik-Ramaj (Kroaci): Gjykata e Rrethit Gjyqësor Vlorë, me vendimin e datës 13.12.2019, e ka dënuar këtë shtetas me 1 vit e 4 muaj burgim, për veprat penale “Plagosja e rëndë me dashje” dhe “Mbajtja pa leje e armëve të ftohta”. Ramaj në vitin 2017, pas një konflikti për motive të dobëta në Vlorë ka plagosur rëndë me thikë shtetasin V. C.
-Eduard Ruçi, banues në Durrës, është ekstraduar nga Italia drejt Shqipërisë, pasi ishte shpallur në kërkim ndërkombëtar. Gjykata e Posaçme e Shkallës së Parë për Korrupsionin dhe Krimin e Organizuar Tiranë, me vendimin penal të datës 06.02.2021, i ka caktuar masën e sigurisë “Arrest në burg” për veprat penale “Korrupsioni pasiv i personave që ushtrojnë funksione publike” dhe “Moskallëzimi i krimit”. Ruçi në vitin 2019, gjatë kohës që ushtronte profesionin e mjekut, në spitalin e burgut të Peqinit dyshohet se i ka kërkuar shumën 2000 euro të afërmit të një dënuari me 35 vjet burgim për vrasje, që të përpilonte një raport mjekësor për dërgimin e të dënuarit në spital për të kryerjen e një operacioni. Gjithashtu, gjatë kohës së ushtrimit të kësaj detyre, 51-vjeçari dyshohet se ka patur dijeni për një të dënuar që mbante aparat celular në ambientet e burgut, por nuk ka kallëzuar.
Shtetasit e ekstraduar iu dorëzuan Drejtorisë së Përgjithshme të Burgjeve.
Top Channel
