Kompania për Distribuimin e Energjisë Elektrike të Kosovës (KEDS) tha se furnizimi me energji elektrike në Kosovë është përkeqësuar për shkak të rënies së njësisë A3 të termocentraleve në Obiliq.

Rënia e kësaj njësie, sipas KEDS-it, ka shtyrë Operatorin e Sistemit të Transmisionit dhe Tregut të Energjisë Elektrike (KOSTT) të kërkojë kufizime emergjente të energjisë elektrike.

“Kjo bën që në vend aktualisht të prodhohen më pak se 400 megavatë, që e bën situatën aspak të favorshme”, thuhet në njoftim.

Aktualisht, qytetarët në Kosovë po përballen me kufizime dy orëshe të energjisë. KEDS kërkoi që qytetarët të kursejnë maksimalisht energjinë, në mënyrë që situata të mos përkeqësohet edhe më shumë.

Në Kosovë, mbi 90 për qind e energjisë elektrike prodhohet përmes termocentraleve Kosova A dhe B. Pjesa tjetër prodhohet përmes burimeve të ripërtërishme, sikurse panelet diellore dhe energjia me erë.

Njoftimi për përkeqësimin e situatës me furnizim me rrymë vjen teksa Kompania Kosovare për Furnizim me Energji Elektrike (KESCO) ka kërkuar më 12 gusht nga Zyra e Rregullatorit të Energjisë (ZRRE) që të shtrenjtohet rryma deri në 88 për qind për amvisëritë dhe deri në 70 për qind për bizneset. Vendimi për tarifat e reja pritet të merret brenda 20 ditësh pune./REL

Top Channel