Ukraina paralajmëron ushtarët rusë në centralin bërthamor

14/08/2022 19:25

Presidenti i Ukrainës Volodymyr Zelensky paralajmëroi ushtarët rusë që godasin centralin më të madh bërthamor të Evropës ose e përdorin atë si bazë nga ku të hapin zjarr se do të bëhen “objektiva” të forcave ukrainase.

Trupat ruse morën nën kontroll objektin bërthamor të Zaporizhzhias në Ukrainën jugore në fillim të luftës, por ai vazhdon të mbahet në funksionim nga teknikë ukrainas.

Mes shqetësimeve për një katastrofë të mundshme bërthamore për shkak të goditjeve që kanë rifilluar atje gjatë ditëve të fundit, Sekretari i Përgjithshëm i OKB-së Antonio Guterres ka bërë thirrje për krijimin e një zone të çmilitarizuar. Ukraina dhe Rusia fajësojnë njëra-tjetrën për sulmet me granata.

“Çdo ushtar rus që ose qëllon në central, ose qëllon duke e përdorur atë për t’u fshehur, duhet të kuptojë se do të bëhet një objektiv i veçantë i agjentëve tanë të zbulimit, shërbimeve tona special dhe ushtrisë sonë,” tha zoti Zelenskiy në fjalimin e tij të përditshëm të shtunën në mbrëmje.

Presidenti ukrainas që nuk dha detaje të mëtejshme, përsëriti se ai kishte bindjen se Rusia po e përdorte centralin për shantazh bërthamor.

Termocentrali ndodhet në bregun e lumit Dnipro në Ukrainën jugore. Forcat ukrainase që kontrollojnë qytetet në bregun përballë Zhaporizhias janë nën bombardime intensive nga zonat nën kontrollin e Rusisë.

Këshilltari presidencial ukrainas Mykhailo Podolyak akuzoi Rusinë se kishte “goditur pjesën e centralit bërthamor ku prodhohet energjia që furnizon jugun e Ukrainës.”

Zyrtari lokal i instaluar nga Rusia, Vladimir Rogov tha në Telegram se forcat ukrainase po bombardonin centralin.

Agjencia Ndërkombëtare e Energjisë Atomike, e cila ka kërkuar të inspektojë centralin, ka paralajmëruar për një katastrofë bërthamore nëse nuk ndalen luftimet. Ekspertët bërthamorë shqetësohen se luftimet mund të dëmtojnë reaktorët e centralit.

Top Channel