Sot bëhet një vit nga aksidenti tragjik në autostradën te Slavonski Brod në Kroaci, ku humbën jetën 10 persona dhe 45 të tjerë u lënduan në autobusin me targa të Kosovës.
Në autobus kishte 67 pasagjerë, përfshirë fëmijë dhe dy shoferë , ndërsa nëntë pasagjerë dhe një shofer humbën jetën.
Autobusi ishte nisur nga Frankfurti i Gjermanisë drejt Prishtinës dhe i përkiste një kompanie nga Kosova, ndërsa u aksidentua në autostradën A3 Zagreb- Lipovac.
10 jetët mbyllën sytë përgjithmonë në atë ditë të kobshme janë shoferi Naser Sylmetaj, lindur më 1974, Gjakovë; Leonora Gjota-Kolmekshaj, lindur më 1982, Junik – Deçan dhe mamaja e saj Gjyle Maloku, Valentina Binakaj dhe vajza e saj Erlinda Binakaj; Sevdail Rrustemi, lindur më 1973, Pakshticë e Epërme – Podujevë; Kujtim Kastrati, lindur më 1981, Radostë; Hamet Hoxha, lindur më 1966 Randobravë – Gjakovë; Anjeza Bellanica dhe Alinda Iprijaj, nënë e 5 fëmijëve.
Presidentja Vjosa Osmani e shpalli ditë zie në Kosovë, 25 korrikun, për shkak të këtij aksidenti tragjik.
Sipas mediave kroate, shoferët e autobusit nga Kosova me emigrantë nga Frankfurti për në Prishtinë kishin pushuar në Bregana për gjysmë ore para aksidentit.
Aty ata ishin ndërruar dhe drejtimin e autobusit e kishte marrë shoferi tjetër. Supozohet se aksidenti është shkaktuar nga lodhja e shoferit.
Ky u cilësua si aksidenti më tragjik në rrugët e Kroacisë në 15 vitet e fundit.
Top Channel
