Zelenskyy akuzon kryeministrin e Sllovakisë për hapjen e “frontit të dytë energjetik” kundër Ukrainës: Putin i dha urdhër për… 28/12 13:41
Kryeministri popullor i Italisë Mario Draghi është bojkotuar nga tre prej partive kryesore në Itali në votëbesimin e qeverisë së tij në parlament.
Thika pas shpine për të erdhi nga partia e drejtuar nga Silvio Berlusconi dhe ajo e ekstremit të djathtë të Matteo Salvinit, të cilët iu bashkuan Lëvizjes Pesë Yjet.
Edhe pse Draghi teknikisht e fitoi votën e besimit, ai nuk pritet të deklarojë fitoren pas bojkotit të partive. Në këto kushte ai pritet të japë dorëheqjen dhe Italia të shkojë në zgjedhje të parakohshme.
Dëshira e tij e shprehur qartë për parlamentin ishte udhëheqja e një qeverie që ka mbështetjen e shumicës së partive nga pas, për të qenë të bashkuar dhe në unitet në këto krizash për Italinë.
Dorëheqja e Draghit do të sjellë probleme edhe për BE-në. Italia është një nga vendet me borxh të lartë publik dhe ndër më të goditurat nga lufta në Ukrainë për shkak të influencës nga gazi rus. Në këto kushte rënia e qeverisë prodhon vështirësi për BE-në, e cila nuk mund të veprojë mbi një sërë vendimesh të forta politike pa miratimin e një prej anëtarëve kryesorë.
Qëndrimi nga palët “e papërgjegjshme” rrezikoi “krijimin e një stuhie të përsosur”, tha Komisioneri i Ekonomisë së BE-së Paolo Gentiloni në Twitter, duke shtuar se Italia përballet me “muaj të vështirë përpara”, por vazhdon të mbetet një komb i madh.
Kriza politike në Itali filloi me tërheqjen nga koalicioni qeverisës i Lëvizjes Pesë Yjet. Dhe ndërsa Draghi paraqiti dorëheqjen pranë presidentit Sergio Mattarella, ajo u refuzua, ndërsa parlamenti kishte fjalën e fundit mbi fatin e tij.
Top Channel
