Sulmi me raketa në qendrën tregtare në Ukrainë, të paktën 13 viktima! NATO përgatit 300 mijë trupa

27/06/2022 23:00

13 të vdekur, gati 60 të plagosur e 50 të zhdukur: sa vjen e rëndohet bilanci i sulmit me raketa në një qendër tregtare të qytetit qendror të Ukrainës, Kremenchuk, e cila në ato momente ka qenë e mbushur me njerëz.

Sulmi u dënua menjëherë nga presidenti Volodymyr Zelensky dhe zyrtarë të tjerë të lartë ukrainas. Pamjet e shpërndara nga vendi i ngjarjes tregojnë se ndërtesa është shkatërruar thuajse plotësisht. “Ky sulm erdhi në një vend që gëlonte nga njerëzit, e që është 100% i parëndësishëm për luftimet. Ka të vdekur dhe të plagosur”, shkroi në profilin e tij në Facebook kryetari i bashkisë së qytetit, Vitaliy Meletskiy.

“Pushtuesit goditën një qendër tregtare me mbi një mijë civilë brenda, një strukturë që nuk përbënte asnjë rrezik për ushtrinë ruse dhe nuk përbënte asnjë vlerë strategjike për ata. Numri i viktimave është i pamundur të imagjinohet. Nga pafuqia, Rusia vazhdon të godasë njerëzit e zakonshëm. Është e kotë të presësh të jenë e arsyeshëm apo njerëzorë”, tha Zelensky.

Ngjarja e rëndë erdhi në ditën kur sekretari i përgjithshëm i NATO-s, Jens Stoltenber njoftoi se rreziku i drejtpërdrejtë që paraqet Rusia ndaj sigurisë europiane, ka nxitur aleacën veri-atlantike të planifikojë një rritje masive të forcave të saj të gatishmërisë së lartë. Nga 40 mijë trupa të tilla që ajo numëron aktualisht, ky numër llogaritet të shkojë në 300 mijë.

Ne do ta transformojmë forcën e reagimit të NATO-së, duke e çuar numrin e saj në më shumë se 300 mijë. Kjo nismë e re ushtarake do ta forcojë në mënyrë drastike mbrojtjen e krahut lindor të aleancës.

Ky është rishikimi më i madh i mbrojtjes së NATO-s që nga koha e Luftës së Ftohtë. Vendimet do të zyrtarizohen në samitin historik të aleancës 30-anëtare të NATO-s në Madrid, i cili mbahet nën hijen e luftës së Rusisë në Ukrainë.

Top Channel