Bombardime pranë Kievit! Vriten civilët duke ikur, Rusia kërcënon fqinjët e Ukrainës

Qyteti është goditur egërsisht me zjarr artilerie e sulme ajrore, sepse qëndron në rrugën e trupave të Moskës drejt kryeqytetit ukrainas. Raportohet për disa civilë të vrarë në këtë zonë; Wall Street Journal thotë se mes tyre ishin dhe dy prindër bashkë me fëmijën e tyre, trupat e pajetë të të cilëve u panë të dergjeshin në tokë pranë monumentit të ushtarëve të vrarë gjatë luftës së Dytë Botërore, ndërsa ngjitur me ta ishte dhe një valixhe e vogël gri, e vetmja qe mesa duket kishin arritur te merrnin me vete në kaosin e largimit.

Më herët, presidenti ukrainas Volodymir Zelensky paralajmëroi se Rusia

po përgatitet për bombardime shkatërrimtare në Odessa. Qyteti i njohur port në brigjet e Detit të Zi duket se do të përballet me të gjithë furinë e ushtrisë ruse, që nuk arriti të merrte ashtu siç shpresonte, kryeqytetin Kiev. Goditja e Odesës “do të përbënte një krim lufte”, tha Zelensky që e bëri në rusisht një pjesë të deklaratës, teksa u kërkoi rusëve të zgjedhin mes jetës dhe skllavërisë, në një kohë kur siç tha, është ende e mundur të mposhtet e keqja, pa humbje të pariparueshme.

“Ata po përgatiten të bombardojnë Odesën. Odesën, qytetin që i ka mirëpritur rusët gjithmonë, qytetit ngrohtësinë e të cilit e kanë ndjerë përherë. Po tani ç’po bëjnë? Bomba kundër Odesës? Predha artilerie? Raketa kundër Odesës? Ky do të jetë një krim historik”, thotë Zelensky.

Konflikti Rus-Ukraina ka hyrë në ditën e 11-të, pa shenja qetësimi. Ministria britanike e mbrojtjes njoftoi se Rusia është duke shënjestruar zonat e banuara në Ukrainë, në përpjekje me sa duket, për të ulur moralin e ukrainasve, rezistenca e të cilëve e befasoi ndjeshëm Moskën. Rusia ka paralajmëruar sakaq edhe fqinjët e Ukrainës të mos hapin bazat e tyre ajrore për forcat e Kievit, duke thënë se ka prova që kjo ka ndodhur me Rumaninë e disa shtete të tjera.

Top Channel