Një vit nga vrasja e Klodian Rashës/ Përkujtohet ngjarja që riktheu protestat e të rinjve

Një formë e shprehjes së zisë dhe përkujtimit së bashku me qirinjtë, lulet dhe fotografinë e buzëqeshur të 25-vjeçarit, i cili pikërisht këtu mori frymë për herë të fundit, mbasi u qëllua mbas shpine nga efektivi Nevaldo Hajdaraj.

I riu u pikas nga një patrullë policie, në lagjen e tij, pasi kishte dalë përtej orarit kufizues të masave anti Covid dhe kur refuzoi të ndalonte, ndaj tij u qëllua me armë policie, ku dhe gjeti vdekjen e menjëhershme. Gjykata e shkallës së parë i dha 10 vite burgim policit që vrau të riun.

I ati i Klodian Rashës kërkon hetime për armën që policia deklaroi paraprakisht se e posedonte viktima.

Në krye të një viti nga vrasja e të riut, shumë ngjarje kanë ndodhur që lidhen me këtë krim, midis të cilave polici që e vrau u shpall fajtor, njëherazi 30 të rinj u dorëzuan si të akuzuar në gjykatë, pasi u përfshinë në protestat masive që kërkuan “drejtësi për Klodianin”.

Ministri i Brendshëm dha dorëheqjen, megjithatë vazhdon të mbetet pa përgjigje pyetja kush e hodhi pistoletën në rrugicën që përshkroi Klodiani, teksa po ndiqej nga policia dhe nëse kjo armë u la aty me qëllimin për të manipuluar këtë vendngjarje. Prokuroria e Tiranës nuk i ka dhënë ende përgjigje me prova këtij hetimit, që gjithashtu ka lënë pezull dilemat ndaj policisë së shtetit, për këtë çështje.

Top Channel