Kreu i Partisë Demokratike, Lulzim Basha i ka shprehur ngushëllimet familjes Preka, për ndarjen nga jeta të aktorit të njohur shkodran, Paulin Preka.
Në mesazhin e tij, Basha thotë se Preka do të mbetet pjesë e plejadës së aktorëve të shquar të teatrit dhe kinematografisë shqiptare.
“Sot arti dhe artdashësit shqiptarë janë në zi për ndarjen nga jeta të aktorit të madh Paulin Preka.
Pinjolli i humorit shkodran do të mbetet pjesë e plejadës së aktorëve të shquar të teatrit dhe kinematografisë shqiptare.
Me humorin e tij ai i dha ngjyra zymtësisë së jetës së shqiptarëve në vitet e regjimit komunist.
U prehtë në paqe!” shkruan Basha.
Aktori Paulin Preka u nda nga jeta në moshën 89-vjeçare. Mjeshtri i Madh i humorit mbylli sytë në Itali, ku ndodhej prej vitesh së bashku me familjen e tij.
Ai numëron me dhjetëra role në teatër dhe kinematografi, ku ka spikatur me estradën e Shkodrës në shumë aktivitete brenda e jashtë vendit.
Top Channel