Një ngjarje e pazakontë ka ndodhur në Kosovë. Mjekët gastroenterolog kanë nxjerrë pa operacion celularin tip “Nokia” nga stomaku i një 33-vjeçari, i cili e kishte gëlltitur së bashku me manualin e përdorimit.
Mbetet e paqartë se si ka ndodhur ngjarja ndërsa mjekët kanë arritur t’ia nxjerrin telefonin e ndarë në tri pjesë, me rrugë endoskopike, pa e prerë lukthin.
Rastin e ka bërë të ditur mjeku Skender Telaku, përmes një postimi në Facebook. I kontaktuar nga mediat kosovare, mjeku tha se u munduan dy orë që të nxirrnin telefonin dhe rreziku ishte i madh sepse bateria mund të shpërthente.
“Ata më thirrën për një rast, ishte një person që kishte gëlltit një trup të huaj. Pamë që ishte telefoni i ndarë në pjesë tri pjesë. Nga të gjitha këto pjesë bateria është më e rrezikshmja sepse mund të shpërthente. Nuk ishte operacion. Nga goja e kemi nxjerrë objektin e huaj. Po të mos kishim sukses do të duhej ta kishim bërë operacion. U munduam dy orë për ta nxjerrë,“-tha doktori.
Doktori nuk përmendi arsyet që kanë çuar 33-vjeçarin deri te gëlltitja e telefonit, por tha se pacienti tani është në gjendje të mirë shëndetësore.
Top Channel
