Qyteti Studenti duket se do të shërbejë si një nga vendqëndrimet për një pjesë të madhe të afganëve që do të mbërrijnë së shpejti në Shqipëri.
Bashkia e Tiranës po zhvillon përgatitjet e nevojshme për të kthyer në funksion të strehimit të tyre një pjesë të godinave të Qytetit Studenti.
Ky është edhe skenari më i mundshëm që mund të zbatojë qeveria për këtë operacion humanitar, edhe pse ende nuk ka detaje se cilat do të jenë godinat ku do të vendosen të huajt dhe familjarët e tyre.
Qëndrimi i tyre në Shqipëri do të jetë i përkohshëm, deri në pajisjen e tyre me vizë amerikane ku më pas do të lëvizin në drejtim të Shteteve të Bashkuara të Amerikës që do të jetë edhe destinacioni filan i tyre.
Ende autoritetet nuk kanë dhënë një shifër të saktë se sa është numri i personave që do të mbërrijnë në vend, megjithatë flitet për një shifër në rreth 2 mijë afganë.
Veç Qytetit Studenti, një tjetër skenar përfshin edhe strehimin e një pjesë të tyre në disa hotele në qytetin bregdetar të Durrësit, edhe pse kapacitetet e strukturave akomoduese janë më të kufizuara për shkak të fluksit të turistëve.
Sot pritet që të mbërrijë në Tiranë edhe avion me afganët e parë të larguar nga vendi i tyre pas pushtimit nga talebanët.
Top Channel
