Një 41-vjeçar është arrestuar në Pogradec , pasi u kap me 22 emigrantë të jashtëligjshëm, të cilëve u kishte premtuar transportin drejt Evropës.
Shtetasi me iniciale N.R. , nga Fieri u kishte kërkuar para refugjatë për t’i kaluar kufirin. Ndërkohë, në kërkim është shpallur 28-vjeçari nga Durrësi, me iniciale F.Q., pasi dyshohet se ka ndihmuar në transportimin e emigrantëve.
Rastet e emigrantëve të paligjshëm, që e përdorin Shqipërinë si vend tranzit, janë shtuar gjatë javëve të fundit. Policia ka raportuar për refugjatë që janë të gatshëm të paguajnë shqiptarët, që t’i ndihmojnë në kalimin e kufirit, për të shkuar më pas në shtetet e BE-së.
Njoftimi i policisë:
Specialistët për Hetimin e Trafiqeve të Paligjshme dhe Narkotikëve në Drejtorinë Vendore të Policisë Korçë, në bashkëpunim me Policinë Kufitare dhe Forcat Speciale “Shqiponjat” në vijim të operacionit policor “Perimetri”, kanë goditur një tjetër rast të aktivitetit kriminal në fushën e dhënies së ndihmës shtetasve të huaj, për kalim të paligjshëm të kufirit kundrejt shpërblimit, si rezultat i të cilit u bë kapja dhe arrestimi në flagrancë i shtetasit N. R., 41 vjeç, banues në Fier dhe u shpall në kërkim shtetasi F. Q., 28 vjeç, banues në Durrës.
Shërbimet e policisë, kanë kapur pranë fshatit Grabovicë, Pogradec, shtetasin N. R., me mjetin tip furgon “Benz”, duke transportuar 22 emigrantë të paligjshëm të cilëve kundrejt shpërblimit, iu kishte premtuar kalimin drejt vendeve të BE-së.
Nga veprimet e mëtejshme hetimore dyshohet se bashkëpunëtor me 41-vjeçarin, në këtë aktivitet kriminal, ishte edhe shtetasi F. Q., i cili u shpall në kërkim dhe po punohet për kapjen e tij.
Materialet në ngarkim të tyre i kaluan Prokurorisë të Rrethit Gjyqësor Korçë për veprime të mëtejshme.
Top Channel
