Rrëzimi i avionit në Lituani, ngrihen dyshime se mund të jetë i lidhur me sabotim 25/11 22:20
Ka prova të pamjaftueshme për të vlerësuar siç duhet origjinën e pandemisë globale të koronavirusit (COVID-19), tha Zyra e Drejtorit të Inteligjencës Kombëtare të SHBA-së.
“Komuniteti i Inteligjencës Amerikane nuk e di saktësisht se ku, kur, ose si u transmetua fillimisht virusi COVID-19, por është bashkuar rreth dy skenarëve të mundshëm: ose ai ka dalë natyrshëm nga kontakti njerëzor me kafshë të infektuara, ose ka qenë një aksident laboratorik”, zëdhënësja Amanda Schoch tha në një deklaratë.
“Ndërsa dy elemente të Komunitetit të Inteligjencës anojnë drejt skenarit të parë dhe një anon më shumë drejt atij të dytë, secili me besim të ulët ose të moderuar, shumica e elementeve brenda komunitetit nuk besojnë se ka informacion të mjaftueshëm për të vlerësuar se njëri është më i mundshëm se tjetri”, shtoi ajo.
Presidenti i SHBA-së, Joe Biden, e ngarkoi komunitetin e tij të inteligjencës të mërkurën për të intensifikuar hetimin mbi origjinën e pandemisë dhe u dha agjencive të inteligjencës 90 ditë për t’i raportuar përsëri për gjetjet e tyre. Wall Street Journal raportoi të dielën se tre studiues në Institutin e Virologjisë në Wuhan të Kinës u sëmurën rëndë në nëntor të vitit 2019 dhe kërkuan kujdes spitalor për të trajtuar simptomat në që përkonin me ato të infeksionit me COVID-19 dhe sëmundje të tjera sezonale.
Lajmi bazohej në inteligjencën amerikane. Pandemia është konsideruar gjerësisht të ketë filluar në dhjetor 2019 në qytetin kinez Wuhan. Ajo ka marrë më shumë se 3,5 milionë jetë dhe ka infektuar 168 milionë njerëz që kur u zbulua për herë të parë, sipas të dhënave të mbledhura nga Universiteti Johns Hopkins. Biden ka thënë se do ta publikojë të plotë raportin e inteligjencës që ai urdhëroi për origjinën e virusit.
Top Channel
