VIDEO/ Përballjet në Europa League, Roma mposht Milanin me një lojtar më pak! Atalanta eleminon Liverpool-in 18/04 22:50
Plot 27 vjet më pas, “mbretëresha” ngjitet sërish në fron. Teuta e Durrësit është kampione e Shqipërisë për herë të dytë në histori, por për herë të parë në foto-finish. Pas 1994-ës të largët, “djemtë e detit” ia dolën të ngjiten në majën më të lartë të futbollit shqiptar, në një sezon të luftuar deri në fund dhe që u vendos vetëm nga diferenca e golave.
Ndeshja e fundit ndaj Apolonisë, e fituar 6-1, ishte fundi i një kampionati, të cilin Teuta e kërkoi që në fillim të sezonit dhe 3 golat e Bregut, i pari në këtë kampionat i kapiten Arapit, firma e Lorenco Vilës nga dy hapa dhe goli i plakut në shtesë, bënë të pavlerë dhe një magji të Mihanës, por njëkohësisht dhe suksesin e Vllaznisë ndaj Laçit.
Në një duel mes katër ekipeve deri në javën e fundit edhe pse dy prej tyre vetëm matematikisht, Teuta arriti t’i rezistojë presionit të tabelës. Një sukses i Martinit në stol, që në vitin më të rëndësishëm të karrierës së tij u detyrua të luftojë dhe kundër zemrës dhe Vllaznisë.
Një sukses padyshim i Dejvi Bregut, blerjes më të rëndësishme të verës së shkuar, që me golat dhe “Këpucën e Artë” përligji investimin duke hyrë përfundimisht në historinë e këtij klubi. Triumfi i dinastisë Vila, me Emiljanon dhe Lorencon, por dhe merita e një mbrojtjeje “dryn” falë Rustem Hoxhës dhe Renato Arapit.
Mbi të gjitha ishte suksesi i një presidenti karizmatik si Hasanbelliu, por dhe atyre që e mbështetën në kërkim të një titulli që dukej i pamundur dhe që vetëm ata e panë në horizont.
Në një prej sezoneve më të luftuar në historinë e Superiores, Teuta ja doli, të rikthehet në fron, të fitojë Superioren dhe të rrëmbejë në fund titullin e kampionatit, që ashtu si 27 vjet më parë, u fitua javë pas jave, duke mos u dorëzuar asnjëherë deri në fund, për suksesin në fotofinish. Teuta nga tani e mbrapa do të njihet dhe njëherë si “mbretëresha” e Shqipërisë./supersport.al
Top Channel
