Agjentët e FBI-së qëllojnë një person para selisë qendrore të CIA-s

05/05/2021 02:44

Një konflikt disaorësh para selisë së Agjencisë Qendrore të Inteligjencës (CIA) në Langley të Virginia-s përfundoi pasi agjentët e FBI-së qëlluan një burrë të hënën në mbrëmje.

Autoritetet thonë se personi u përpoq të futej me makinë në objekt rreth orës 18:00 sipas kohës lokale por nuk mundi të kalonte portën kryesore e cila ndodhet shumë larg nga objekti.

Agjentët e FBI-së u përpoqën të negociojnë me burrin për orë të tëra dhe në një moment vendosën ta largonin makinën nga rruga. Më pas shoferi, siç njoftohet, ka dalë nga makina me armë dhe është qëlluar nga agjentët. Gjendja e tij në spital nuk dihet. Raportohet se burri njoftoi se kishte eksploziv në makinë, por kjo nuk është konfirmuar. Zyrtarët e zbatimit të ligjit gjithashtu thonë se personi mund të kishte probleme mendore dhe mund të jetë përpjekur të futet në kampusin e CIA-s në të kaluarën.

“FBI merr seriozisht të gjitha incidentet e të shtënave që përfshijnë agjentët tanë ose anëtarët e grupit të punës. Procesi i auditimit është i plotë dhe objektiv dhe kryhet me shpejtësi në rrethanat e dhëna”, thuhet ndër të tjera në deklaratë.

Masat e sigurisë rreth ndërtesave qeveritare përreth Washington-it janë shtuar jashtëzakonisht shumë këtë vit që nga trazirat në Kapitolin e SHBA-së në janar. Në prill, një oficer i Kapitolit u vra dhe një tjetër u plagos kur një burrë u përpoq të përplaste makinën e tij në pengesën përreth ndërtesës së Kongresit dhe selisë së Legjislaturës Federale të SHBA-së.

Top Channel