Rama heq veteranët, zbulohen kush janë të rinjtë që do udhëheqin listën e PS në çdo qark

Rama është shprehur se këtë herë e ka ndryshuar skemën dhe vendet e para do t’i lihen të rinjve, grave dhe vajzave.

Rama: E kam parë që është thënë në disa raste nga ju nëpër disa media për propozimin që këtë herë koncepti tradicional i rreshtimit në lista duhet të përmbyset. Është e pakuptimtë që udhëheqja të rrijë në krye në vendet e para të listës që në fakt nuk është të rrish në krye të betejës. Vendet e para janë një pasqyrë ku mund të shohësh një pjesë jo të vogël të materialit që ka skuadra, janë të rëndësishme edhe për të prezantuar një pozicion në raport me publikun, por edhe se nuk janë vija e parë e luftës me objektivin.

Vendet e para i duhen lënë të rinjve, grave, vajzave, që nuk janë enturazh në PS, por janë aktorë të rëndësishëm të të gjithë procesit tonë dhe nga ana tjetër, fuqizimi i mëtejshëm i grave dhe vajzave është pjesë e vizionit tim për këtë vend dhe i vizionit të PS për përfaqësimin në këtë vend.

Pra, unë mendoj që është e rëndësishme të ndalem këtu për të sqaruar këtë mesazh. Nuk e kuptoj cfarë kuptimi ka që të jem në vendin e parë të listës në Durrës dhe në Vlorë.

Unë do vendosem aty ku është objektivi bazë dhe me skuadrën bazë do luftoj për të arritur objektivin maksimal. Pikërisht se jam udhëheqësi i partisë, kam detyrën t’i bëj të dyja.

Më pas ka bërë prezantimin e emrave që do të kryesojnë listat e qarqeve. Vihet re se të gjitha janë femra dhe vetëm në dy qarqe, listat udhëhiqen nga Erion Braçe dhe Lavdrim Krashi. Sa i përket listës së Tiranës, u shpreh se nuk i ndan dot Najada Çomon dhe Luljeta Bozon, për të cilat thotë se kanë arritur t’i përçojnë komunitetit një përmasë të prekshme përkujdesje dhe dashurie.

Vendi i parë në Listën e Shkodrës: Edona Bilali

Vendi i parë në Listën e Vlorës: Pranvera Sulaj

Vendi i parë në Listën e Kukësit: Greta Duraku

Vendi i parë në Listën e Korçës: Eni Zake

Vendi i parë në Listën e Dibrës: Lavdrim Krashi

Vendi i parë në Listën e Berat: Hatixhe Konomi

Vendet e para në Listën e Tiranës: Luljeta Bozo dhe Najada Çomo

Vendi i parë në Listën e Fierit: Erion Braçe

Vendi i parë në Listën e Elbasanit: Evis Kushi

Vendi i parë në Listën e Gjirokastrës: Mirela Kumbaro

Vendi i parë në Listën e Lezhës: Lindita Nikolla

Vendi i parë në Listën e Durrësit: Milva Ekonomi

Top Channel