Tre persona kanë rënë në prangat e policisë së Tiranës për vepra të ndryshme penale.
Forcat blu bëjnë me dije se një 29-vjeçar u kap në hotel tek bulevardi “Zogu i Parë” me një 61-vjeçare, me të cilën po kryente marrëdhënie seksuale kundrejt shpërblimit. Të dy janë arrestuar dhe akuzohen për veprat penale “Prostitucioni” dhe “Shfrytëzimi i prostitucionit”.
Ndërsa një 23-vjeçar, banues në Tropojë u arrestua pasi u konstatua me sasi farash të dyshuar kanabisi. Policia bën me dije se është proceduar në gjendje të lirë një 46-vjeçar pasi u konfliktua me një tjetër për motive të dobëta.
Njoftimi i policisë: Arrestohen në flagrancë 3 shtetas dhe procedohet penalisht 1 tjetër, për vepra të ndryshme penale.
Forca e posaçme “Shqiponjat”, në zbatim të Planit të Masave për rritjen e parametrave të sigurisë, parandalimin dhe goditjen e paligjshmërisë, si dhe evidentimin e personave që lëvizin me sende të kundërligjshme, në bulevardin “Dëshmorët e Kombit”, kanë konstatuar dhe ndaluar shtetasin L. Rr. Gjatë kontrollit fizik të ushtruar ndaj tij, Policia gjeti dhe sekuestroi në cilësinë e provës materiale një sasi farash të dyshuar kanabisi. Në përfundim të veprimeve, nga Seksioni për Hetimin e Narkotikëve u bë arrestimi në flagrancë i shtetasit L. Rr., 23 vjeç, banues në Tropojë.
Nga specialistët për Hetimin e Trafiqeve të Paligjshme në DVP Tiranë u arrestuan në flagrancë për veprat penale “Prostitucioni” dhe “Shfrytëzimi i prostitucionit, shtetasja N. P., 61 vjeçe, banuese në Fier dhe shtetasi O. B., 29 vjeç, banues në Tiranë, sepse në bulevardin “Zogu i Parë”, në ambientet e një hoteli, shtetasja N. P. është kapur në flagrancë duke kryer marrëdhënie seksuale me shtetasin O. B., kundrejt shpërblimit.
Specialistët për Hetimin e Krimit në Komisariatin e Policisë Nr. 1 proceduan në gjendje të lirë shtetasin F. H., 46 vjeç, pasi është konfliktuar me shtetasin A. M., për motive të dobëta.
Materialet iu dërguan Prokurorisë së Rrethit Gjyqësor Tiranë, për veprime të mëtejshme.
Top Channel
