Mat/ Armë pa leje dhe gjueti e paligjshme, një i arrestuar dhe një nën hetim. Ja çfarë zbuloi policia gjatë kontrollit

Policia njofton se në kuadër të këtij operacioni janë sekuestruar 1 armë zjarri pushkë, 2 armë gjahu çifte dhe municion luftarak.

Gjithashtu, janë ndëshkuar me masë administrative 80.000 secili, për gjueti të paligjshme, 2 shtetas, si dhe me masë 10.000 lekë secili, për mosrespektim të orarit të ndalimit të lëvizjes pas orës 22:00 në kuadër të masave anticovid, 5 shtetas.

Policia njofton se:

Në kuadër të planit të masave dhe forcimit të kontrolleve në zbatim të moratoriumit të gjuetisë në Republikën e Shqipërisë, kanë organizuar punën duke ushtruar kontrolle të befasishme në orare të vona. Si rezultat, në vendin e quajtur “Fusha e Lajthit’, Balgjaj, Bashkia Klos, shërbimet e Policisë kanë evidentuar dhe goditur një rast të armëmbajtjes pa leje.

Gjatë kontrollit të zonës, shërbimet e Policisë kanë ndaluar dhe kontrolluar shtetasit Sh. T. dhe F. P., të cilët posedonin dy armë gjahu çifte që i mbanin pa leje, me të cilat dyshohej se po kryenin gjueti të paligjshme.

Gjithashtu, gjatë kontrollit të ushtruar në një ambient në përdorim nga shtetasi Sh. T., në zonën e Balgjajt, shërbimet e Policisë kanë gjetur edhe 1 armë zjarri pushkë dhe një sasi municioni luftarak.

Në cilësinë e provës materiale janë sekuestruar 2 armë gjahu çifte, 1 armë zjarri pushkë dhe 578 fishekë.

Në përfundim të veprimeve të para hetimore, nga specialistët për Hetimin e Krimeve në Komisariatin e Policisë Mat u bë arrestimi në flagrancë i shtetasit Sh. T., 47 vjeç, si dhe filloi procedimi penal në gjendje të lirë për shtetasin F. P., 39 vjeç, të dy banues në fshatin Mallunxë, Mat, të cilët janë ndëshkuar edhe me masën administrative 80.000 lekë secili, për shkelje të moratoriumit të gjuetisë së paligjshme në Republikën e Shqipërisë.

Gjithashtu, këta shtetas dhe 3 shtetas të tjerë që u konstatuan të gjithë bashkë nga Policia, janë ndëshkuar me masën administrative 10.000 lekë secili, për mosrespektimin e ndalimit të qarkullimit pas orës 22:00.

Materialet procedurale i kaluan Prokurorisë së Rrethit Gjyqësor Mat, për veprat penale “Mbajtja pa leje e armëve, armëve shpërthyese dhe e municionit” dhe “Mbajtja pa leje e armëve të gjuetisë dhe sportive” në ngarkim të shtetasit Sh. T., si dhe për veprën penale “Mbajtja pa leje e armëve të gjuetisë dhe sportive” në ngarkim të shtetasit F. P.

Top Channel