Kryeministri gjeorgjian pezullon bisedimet e anëtarësimit në BE deri në fund të vitit 2028 28/11 22:56
Një grup prej 30 azilkërkuesve, të cilëve u ishte refuzuar qëndrimi në Gjermani kanë mbërritur në Kabul.
Ata u deportuan nga Gjermania, thanë zyrtarët nga Ministria afgane e Refugjatëve dhe Riatdhesimit të enjten. Një total prej 937 azilkërkuesve janë dërguar nga Gjermania në Afganistan që nga dhjetori i vitit 2016 përmes 34 fluturimeve. Fluturimi i parafundit i dëbimit nga Gjermania ndodhi në muajin mars. Vendet e tjera anëtare të Bashkimit Evropian gjithashtu kanë rinisur fluturimet e dëbimit.
Një aeroplan me 11 migrantë të dëbuar nga Austria dhe Bullgaria u ul në Kabul më 16 dhjetor. Grupet e të drejtave të njeriut kanë kritikuar deportimet, duke thënë se Afganistani, i shkatërruar nga dekada të luftës, është shumë i rrezikshëm për t’i kthyer azilkërkuesit përsëri. Pavarësisht nga fillimi i bisedimeve të paqes midis qeverisë së Kabulit dhe militantëve në shtator, konflikti vazhdon dhe situata e sigurisë po përkeqësohet. Ka sulme të përditshme nga talibanët dhe militantët e Shtetit Islamik, të cilat po u shkaktojnë dëme civilëve në këtë vend. Më 16 dhjetor, zyrtarët afganë thanë të paktën 13 oficerë policie u vranë në një sulm në një pikë kontrolli sigurie në provincën veriore të Baghlan.
Misioni i Kombeve të Bashkuara në Afganistan (UNAMA), thotë se 5.939 viktima civile – 2.117 njerëz të vrarë dhe 3,822 të plagosur – u regjistruan në nëntë muajt e parë të këtij viti. Pandemia e koronavirusit e ka përkeqësuar më shumë situatën, në një nga vendet më të varfra të botës. Kombet e Bashkuara paralajmëruan se 5 milionë afganë do të kenë nevojë për ndihmë vitin e ardhshëm për shkak të pandemisë së COVID-19 dhe rritjes së konflikteve.
Top Channel
