Ja kur do të hidhet shorti i Play-off-it të Botërorit, ku Shqipëria do të mësojë edhe kundërshtarët dhe si do të funksionojë 14/11 02:18
Me të dy skuadrat me pikë të barabarta në krye të renditjes, nuk mund të kishte kohë më të mirë për zhvillimin e “klasikes” së futbollit gjerman, përballjes mes Borussias së Dortmundit dhe Bayernit të Mynihut, që është programuar për pasditen e sotme në orën 18:30.
“Der Klassiker” vjen këtë herë edhe si një përballje mes mbrojtjes më të mirë të kampionatit, që është ajo e verdhezinjve të Dortmundit dhe sulmit më të mirë, që është ai i kampionëve në fuqi të Bayernit.
Këta të fundit e kanë dominuar përballjen me Borussian, pasi kanë fituar 61 ndeshje, kanë barazuar 33 dhe kanë humbur po kaq, megjithatë verdhezinjtë kanë fituar të tre ndeshjet e zhvilluara në “Signal Iduna Park” dhe duan të vijojnë me këtë ecuri pozitive.
Mbrojtja e fortë vjen edhe për shkak të një kontrolli të dendur të topit, pasi Borussia ka një mesatare prej 63% të zotërimit të sferës për ndeshje, ndërsa vlen të theksohet se këtë sezon ka ndryshuar edhe strategjia e lojës.
Verdhezinjtë nuk janë më ajo skuadra që luan hapur në sulm dhe shënon e pëson gola rregullisht, por qarkullon topin për të lodhur kundërshtarin dhe sulmon në 30 minutat e fundit të ndeshjes, çka shpjegohet edhe me faktin që 60% e golave janë shënuar pas minutës së 60’.
Megjithatë edhe Bayerni nuk mbetet pas në këtë aspekt, pasi kampionët në fuqi të Gjermanisë dhe Europës u bënë skuadra e parë në historinë e Ligës së Kampionëve, që shënojnë 4 gola në 15 minutat e fundit të ndeshjes, në fitoren e thellë 2-6 ndaj Salzburgut.
Një sfidë brenda sfidës do të jetë edhe ajo mes dy sulmuesve Erling Haaland dhe Robert Lewandowski, që me golat e shumtë janë shndërruar në “lokomotiva” të skuadrave përkatëse.
Talenti norvegjez i Borussias së Dortmundit ka shënuar 18 gola në 20 ndeshje të zhvilluara në Bundesligë që kur u transferua në muajin janar dhe ka një mesatare realizimi prej 36% të gjuajtjeve në kuadrat.
Për Lewandowskin nuk ka nevojë për shumë fjalë, pasi edhe këtë sezon e ka nisur në mënyrë perfekte dhe ia ka dalë të shënojë 10 gola e të asistojë 3 të tjerë, ndërsa në 12 ndeshje të zhvilluara kundër Borussias ia ka dalë të shënojë plot 16 herë.
Edhe këtë sezon Borussia e Bayerni do të duelojnë deri në fund për titullin kampion dhe sfida e sotme do të jetë një shans që verdhezinjtë të provojnë të shkëputen të vetëm në krye dhe të provojnë të thyejnë hegjemoninë e bavarezëve në kampionat.
Top Channel
