Një sistem i rrallë yjor është zbuluar në galaksinë tonë, por ai është i destinuar të përfundojë në një shpërthim masiv.
Sistemi yjor, që duket si një helikë kozmike, ndodhet 8 mijë vite dritë larg tokës. Por është aq i rrallë sa që astronomët nuk prisnin kurrë të gjenin një të tillë në galaksinë tonë. Ai është i njohur si një sistem yjor Wolf Rayet.
Vetëm disa yje masive kthehen në sisteme Wolf Rayet ndërsa i afrohen fundit të jetës së tyre. kjo fazë zgjat disa qindra e mijëra vite por kur flasim për jetëgjatësinë e një ylli, kjo është një periudhë shumë e shkurtër. Vetëm një nga njëqindmilionë yje janë aq të mëdhenj sa të klasifikohen në sistemin Wolf Rayet. Dhe një çift yjesh të tillë, është diçka akoma më e rrallë.
Dhe kjo është ajo që astronomët zbuluan fillimisht kur pikasën sistemin në 2018. Brenda këtij sistemi ka dy yje masivë që orbitojnë rreth njëri tjetrit por edhe një yll tjetër shoqërues të lidhur me ta nga graviteti.
Të dy yjet, janë secili 10 deri 15 herë më të mëdhenj se dielli jonë dhe 100 mijë herë më të shndritshëm. Krahasuar me temperaturën në sipërfaqe të diellit, që është rreth 5505 gradë celcius, ajo e këtyre yjeve arrin deri në 25 mijë gradë celcius ose më shumë. Kërkuesit e kanë quajtur sistemin Apep, sipas gjarprit egjiptian zot i kaosit.
Tani, astronomët kanë mësuar më shumë mbi këta yje të rrallë, orbitën e tyre rreth njëri tjetrit etj. Por, këta yje jashtëzakonisht të shndritshëm dhe të nxehtë, janë të bukur por të mallkuar. Ajo që i pret është zakonisht një shpërthim supernove që do të bëjë që në vend të yllit të ketë një vrimë të zezë.
Top Channel
